കോഴിക്കോട്: സൈബർ ഗുണ്ട ആക്രമണത്തെ തുടർന്ന് നടി സജിത മഠത്തിൽ ഫേസ്ബുക്ക് പേജ് ഡിലീറ്റ് ചെയ്തു. താരരാജാക്കൻമാരുടെ സൈബർ ഗുണ്ട ആർമിയുടെ ആക്രമണം താങ്ങാനുള്ള കരുത്തില്ലെന്നും അതിനാൽ പേജ് ഡിലീറ്റു ചെയ്യുകയാണെന്നും സജിത അറിയിച്ചു. ഫേസ്ബുക്ക് അക്കൗണ്ടും തൽക്കാലം ഡീആക്ടിവേറ്റ് ചെയ്യേണ്ടിവരുമെന്നും അവർ കൂട്ടിച്ചേർത്തു.
ചലച്ചിത്ര അവാർഡ്ദാന ചടങ്ങിലേക്ക് മുഖ്യതിഥിയായി മോഹൻലാലിനെ ക്ഷണിക്കരുതെന്ന ഭീമഹർജിയിൽ ഒപ്പുവച്ചതുമായി ബന്ധപ്പെട്ട വിവാദത്തിലാണ് സജിതയുടെ ഫേസ്ബുക്ക് പേജിൽ സൈബർ ഗുണ്ട ആക്രമണമുണ്ടായത്. നേരത്തേ, ഇതേവിഷയത്തിൽ സൈബർ ആക്രമണം നേരിട്ട സംവിധായകൻ ഡോ. ബിജുവും ഫേസ്ബുക്ക് പേജ് ഡിലീറ്റ് ചെയ്തിരുന്നു.
