തിരുവനന്തപുരം: കഴിഞ്ഞ പ്രളയത്തിലെ സാലറി ചലഞ്ചിൽ പങ്കെടുക്കാത്ത സർക്കാർ ജീവനക്കാർക്ക് ഇത്തവണ ആദ്യം മുഖ്യമന്ത്രിയുടെ ദുരിതാശ്വാസ നിധിയിലേക്ക് ഒരു മാസത്തെ ശന്പളം നൽകാനുള്ള സുവർണാവസരമെന്നു മുഖ്യമന്ത്രി പിണറായി വിജയൻ. ഇത്തവണയും സർക്കാർ ജീവനക്കാർക്കു സാലറി ചലഞ്ച് പോലുള്ളവ ഏർപ്പെടുത്തുമോ എന്ന മാധ്യമ പ്രവർത്തകരുടെ ചോദ്യങ്ങൾക്കു മറുപടി നൽകുകയായിരുന്നു മുഖ്യമന്ത്രി.
സാലറി ചലഞ്ചിനെക്കുറിച്ച് ഇപ്പോൾ ആലോചിച്ചിട്ടില്ല. എന്നാൽ, ചില പെൻഷൻകാരും ജീവനക്കാരും അടക്കമുള്ളവർ ഒരുമാസത്തെ ശന്പളവും പെൻഷനും ചോദിക്കാതെതന്നെ മുഖ്യമന്ത്രിയുടെ ദുരിതാശ്വാസ നിധിയിലേക്കു നൽകിയിട്ടുണ്ട്.
മന്ത്രിമാർ ഒരു മാസത്തെ ശന്പളവും അലവൻസുകളും അടക്കമുള്ള ഒരു ലക്ഷം രൂപ വീതം നൽകും. മുഖ്യമന്ത്രിയുടെ ദുരിതാശ്വാസ നിധിയിലേക്കുനൽകുന്ന എത്ര ചെറിയ തുകയും ചെറുതല്ല, എത്ര വലിയ തുകയും വലുതുമല്ലെന്നും മുഖ്യമന്ത്രി പറഞ്ഞു.
