ബോളിവുഡ് സൂപ്പർതാരം സൽമാൻ ഖാൻ എപ്പോഴും വാർത്തകൾ സൃഷ്ടിക്കും. കൃഷ്ണമൃഗത്തെ വേട്ടയാടിയും മദ്യപിച്ച് കാറോടിച്ചും പോലീസ് കേസിൽ അകപ്പെട്ട അതേ സൽമാൻ തന്നെ പലപ്പോഴും നന്മനിറഞ്ഞ പ്രവൃർത്തികളിലൂടെ വാർത്തകൾ സൃഷ്ടിക്കാറുണ്ട്.
സൽമാൻ തന്നെ മരണത്തിൽ നിന്ന് രക്ഷിച്ച കഥ പറയുകയാണ് ഒരുകാലത്ത് ഹിന്ദി സിനിമയിൽ നായികയായിരുന്ന പൂജാ ദഡ്വാൾ.
ക്ഷയരോഗം ഗുരുതരാവസ്ഥയിലായി ആരും സഹായിക്കാനില്ലാതെ മരണത്തെ മുന്നിൽ കണ്ട് കഴിഞ്ഞ പൂജയെ ജീവിതത്തിലേക്ക് തിരികെ കൊണ്ടുവന്നത് സൽമാനായിരുന്നു. രക്ഷപെടാനുള്ള എല്ലാ വഴികളുമടഞ്ഞപ്പോൾ പൂജ സഹായം ആവശ്യപ്പെട്ട് വീഡിയോ സന്ദേശം അയച്ചിരുന്നു.
ഇതു വലിയ വാർത്തയായി മാറി. ഇതേ തുടർന്നാണ് സൽമാൻ പൂജയ്ക്ക് ആവശ്യമായതെല്ലാം എത്തിച്ചു കൊടുത്ത് പൂജയെ ജീവിതത്തിലേക്ക് മടക്കിക്കൊണ്ടു വന്നത്.
ആരോഗ്യം വീണ്ടെടുത്ത പൂജ സൽമാനോടുള്ള നന്ദി തുറന്ന് പ്രകടിപ്പിക്കുകയും ചെയ്തു. ഒരു മാധ്യമത്തിന് നൽകിയ അഭിമുഖത്തിലാണ് അവർ ഇക്കാര്യം പറഞ്ഞത്. ക്ഷയരോഗം മൂർഛിച്ച് പൂജയുടെ ശരീരതൂക്കം 23 കിലോയായി കുറഞ്ഞിരുന്നു.
ബന്ധുക്കളോ സുഹൃത്തുക്കളോ തന്നെ തിരിഞ്ഞു നോക്കിയില്ലെന്നും എന്നാൽ മരുന്നും ഭക്ഷണവും സൽമാൻ ഖാൻ എത്തിച്ചു തന്നുവെന്നും പൂജ പറയുന്നു. സൽമാന്‍റെ വീർഗതി എന്ന ചിത്രത്തിലെ നായികയായിരുന്നു പൂജ ദഡ്വാൾ.
