ബോളിവുഡ് സൂപ്പർ താരം സൽമാൻ ഖാൻ താമസിക്കുന്ന മുംബൈയിലെ ഗാലക്സി അപ്പാർട്ട്മെന്‍റിൽ അനധികൃതമായി ക‍യറാൻ ശ്രമിച്ച പെൺകുട്ടിയെ പോലീസ് പിടികൂടി. അപ്പാർട്ട്മെന്‍റ് വളപ്പിലെ മതിൽചാടിക്കടക്കാൻ ശ്രമിക്കവേയാണ് മധ്യപ്രദേശിൽനിന്നു വന്ന 15കാരി പിടിയിലായത്. ചോദ്യം ചെയ്യലിൽ താൻ സൽമാന്‍റെ ആരാധികയാണെന്നും അദ്ദേഹത്തെ കാണാനെത്തിയതാണെന്നും പെൺകുട്ടി പറഞ്ഞതായി പോലീസ് അറിയിച്ചു.
സൽമാന്‍റെ വസതി ചോദിച്ചെത്തിയ പെൺകുട്ടിയെ അപ്പാർട്ട്മെന്‍റ് സെക്യൂരിറ്റിക്കാർ തടയുകയായിരുന്നു.തുടർന്നാണ് പെൺകുട്ടി മതിൽ ചാടി അകത്തു കടക്കാൻ ശ്രമിച്ചതെന്നു പോലീസ് പറഞ്ഞു. കൈവശമുണ്ടായിരുന്ന തിരിച്ചറിയൽ രേഖകളിൽനിന്നാണു പെൺകുട്ടി മധ്യപ്രദേശിലെ ഭോപ്പാൽ സ്വദേശിയാണെന്നു കണ്ടെത്തിയത്.
എന്നാൽ എങ്ങനെയാണ് ഇത്രദൂരം പെൺകുട്ടി ഒറ്റയ്ക്ക് വന്നതെന്നു വ്യക്തമായിട്ടില്ല. സൽമാനെ കാണാനെ തിരികെപ്പോകില്ലെന്നു കുട്ടി പറഞ്ഞതായി പോലീസ് അറിയിച്ചു. മാതാപിതാക്കൾ അന്വേഷിച്ചെത്തുമെന്ന പ്രതീക്ഷയിൽ കക്ഷിയെ മുംബൈയിലുള്ള ശിശു സംരക്ഷണ കേന്ദ്രത്തിൽ പാർപ്പിച്ചിരിക്കുകയാണ് പോലീസ്.
