ബോളിവുഡിലെ വലിയ ഖാൻ ആരായിരിക്കും? വിലയിരുത്താൻ കഴിയുമോ? കഴിയില്ല എന്നുതന്നെ പറയേണ്ടിവരും. ഓരോ ഖാനും അവരുടേതായ രീതിയിൽ മുന്നിൽനിൽക്കുന്നു. പറഞ്ഞുവരുന്നത് ഏറ്റവും പുതിയ റിപ്പോർട്ടിനെക്കുറിച്ചാണ്. സൽമാൻ ഖാൻ കേന്ദ്രകഥാപാത്രമായ “ബജ്റംഗി ഭായ്ജാൻ’ ചൈനയിൽ റിലീസ് ചെയ്ത് ആദ്യ ദിനംതന്നെ റക്കാർഡ് മറികടന്നു.
ആദ്യ‌ദിനത്തിലെ ബോക്സ് ഓഫീസ് കളക്‌ഷൻ 23.8 ലക്ഷം ഡോളർ. ആമിർ ഖാന്‍റെ 3 ഇഡിയറ്റ്സ് ചൈനയിൽനിന്ന് ആകെ നേടിയതിലും കൂടുതലാണ് ബജ്റംഗി ഭായ്ജാൻ ഒറ്റ ദിവസംകൊണ്ട് നേടിയത്. 22 ലക്ഷം ഡോളറായിരുന്നു 3 ഇഡിയറ്റ്സിന്‍റെ ചൈനയിലെ ബോക്സ് ഓഫീസ് കളക്‌ഷൻ.
8000 സ്ക്രീനുകളിലാണ് ബജ്റംഗി ഭായ്ജാൻ പ്രദർശിപ്പിച്ചത്. ഇതാണ് നേട്ടത്തിനു വഴിയൊരുക്കിയത്. കബീർ ഖാൻ ഒരുക്കിയ ബജ്റംഗി ഭായ്ജാൻ, ലിറ്റിൽ ലോലിത മങ്കി ഗോഡ് അങ്കിൾ എന്ന പേരിലാണ് ചൈനയിൽ പ്രദർശനത്തിനെത്തിയിരിക്കുന്നത്.
