കരാർ ഒപ്പിട്ട പ്രോജക്ടുകൾ പൂർത്തിയാകുന്ന മുറയ്ക്ക് സിനിമയിൽനിന്നു സാമന്ത ഒരു ബ്രേക്കെടുക്കാൻ തീരുമാനിച്ചതായി റിപ്പോർട്ടുകൾ.
പ്രൈം വീഡിയോസിന്‍റെ ആഗോള സ്പൈ സീരിസ് സിറ്റാഡല്‍ പൂര്‍ത്തിയായാല്‍ കരിയറില്‍ ഇടവേളയെടുക്കുമെന്നാണ്. സൂചനകൾ. സിറ്റാഡലിന് പുറമെ തെലുങ്ക് ചിത്രം ഖുശിയും താരത്തിനു പൂര്‍ത്തിയാക്കാനുണ്ട്.
സിറ്റാഡലില്‍ വരുണ്‍ ധവാനും ഖുശിയില്‍ വിജയ് ദേവരകൊണ്ടയുമാണ് സഹതാരങ്ങള്‍. വരും ദിവസങ്ങളില്‍ ഇരു ചിത്രങ്ങളും പൂര്‍ത്തിയാകുമെന്നും ചികത്സാവശ്യങ്ങള്‍ക്കായി ഒരുവര്‍ഷം അവധിയെടുക്കുമെന്നും ഒരു ദേശീയ മാധ്യമം റിപ്പോര്‍ട്ട് ചെയ്യുന്നു.
കഴിഞ്ഞ വര്‍ഷമാണ് തന്‍റെ രോഗവിവരം സാമന്ത ആരാധകരെ അറിയിച്ചത്. ശരീരത്തിലെ മസിലുകളെ ദുര്‍ബലപ്പെടുത്തുന്ന മയോസൈറ്റിസ് എന്ന ഓട്ടോ ഇമ്യൂണ്‍ രോഗമാണ് സാമന്തയെ ബാധിച്ചത്. ചികിത്സാര്‍ഥം അവധിയെടുക്കുമെന്നാണ് വിവരം.
സാമന്തയുടെ ബോളിവുഡ് അരങ്ങേറ്റവും അടുത്ത കാലങ്ങളില്‍ വാര്‍ത്തകളില്‍ നിറഞ്ഞിരുന്നു. എന്നാല്‍ പുതിയ പ്രോജക്റ്റുകള്‍ സ്വീകരിക്കുന്നില്ലെന്നും മുന്‍കൂര്‍ വാങ്ങിയ പണം തിരികെ നല്‍കുന്നതായും റിപ്പോര്‍ട്ടുണ്ട്.
അഭിജ്ഞാന ശാകുന്തളം ആസ്പദമാക്കി ഒരുക്കിയ ശാകുന്തളമാണ് സാമന്തയുടെതായി അവസാനം പുറത്തിറങ്ങിയ സിനിമ.
