സാമന്തയുടെയും നാഗചൈതന്യയും വേർപിരിയലായിരുന്നു കഴിഞ്ഞ കുറച്ചു ദിവസങ്ങളായി ആരാധകർക്കിടയിലെ ചർച്ച. വിവാഹമോചിതരാകാൻ തീരുമാനിച്ചുവെന്ന് അറിയിച്ചതു മുതൽ ഇരുവരേയും ബന്ധിച്ച് നിരവധി ഗോസിപ്പുകളും വന്നിരുന്നു.
സാമന്തയെ കുറ്റപ്പെടുത്തിക്കൊണ്ടായിരുന്നു കമന്‍റകളിൽ ഏറെയും. ഒടുവിൽ സഹികെട്ട് സാമന്ത പ്രതികരിക്കുകയും ചെയ്തിരുന്നു. ഒക്ടോബർ രണ്ടിന് ഇരുവരും ഒരു സംയുക്ത പ്രസ്താവന പുറത്തിറക്കിയാണ് വിവാഹമോചന വാർത്ത അറിയിച്ചത്.
ഇപ്പോൾ ഗോസിപ്പുകൾക്കെല്ലാം ഗുഡ്ബൈ പറഞ്ഞ് വീണ്ടും സിനിമയിൽ സജീവമാകാനുള്ള തയാറെടുപ്പിലാണ് സാമന്ത. വിജയദശമി ദിനത്തിൽ താരത്തിന്‍റെ ഏറ്റവും പുതിയ സിനിമയുടെ പ്രഖ്യാപനവും നടന്നു.ഹരീഷും ഹരി ശങ്കറും ചേർന്നാണ് സിനിമ സംവിധാനം ചെയ്യുന്നത്.
സാമന്ത നായികയാകുന്ന പുതിയ ചിത്രം തെലുങ്കിലും തമിഴിലുമായിട്ടുമാണ് എത്തുക. നായിക വേഷത്തിന് പ്രാധാന്യമുള്ള ചിത്രമായിരിക്കും ഇതെന്നാണ് പ്രതീക്ഷിക്കപ്പെടുന്നത്. ശ്രീദേവി മൂവീസാണ് സിനിമയുടെ നിർമാണം. അതേസമയം ചിത്രത്തിന്‍റെ പേര് പുറത്തുവിട്ടിട്ടില്ല. സിനിമയുടെ ചിത്രീകരണം നവംബറിൽ ആരംഭിക്കും.
നവാഗത സംവിധായകനായ ശന്തരുബൻ ജ്ഞാനശേഖരനുമൊത്തുള്ള മറ്റൊരു ദ്വിഭാഷാ ചിത്രവും ഇതോടൊപ്പം പ്രഖ്യാപിച്ചിട്ടുണ്ട്. ഉടൻ തന്നെ ആദ്യമായി അഭിനയിക്കുന്ന ബോളിവുഡ് സിനിമയുടെ വിശേഷങ്ങളും സാം ഉടൻ പുറത്തുവിട്ടേക്കും.
അടുത്തിടെയാണ് സാമന്ത മിത്തോളജിക്കൽ സിനിമയായ ശാകുന്തളത്തിന്‍റെ ചിത്രീകരണം പൂർത്തിയാക്കിയത്. മലയാളി താരം ദേവ് മോഹനാണ് ചിത്രത്തിൽ നായകൻ. ഗുണശേഖരനാണ് സിനിമ സംവിധാനം ചെയ്തത്. അല്ലു അർജുന്‍റെ മകൾ അല്ലു അർഹയും ചിത്രത്തിൽ ഒരു സുപ്രധാന വേഷത്തിൽ എത്തിയിരുന്നു.
കൂടാതെ വിഘ്നേഷ് ശിവൻ സിനിമ കാത്ത് വാക്ക് രണ്ടുകാതൽ എന്ന സിനിമയും സാമന്തയുടേതായി റിലീസിന് ഒരുങ്ങുകയാണ്. വിജയ് സേതുപതിയാണ് ചിത്രത്തിൽ നായകൻ.
