തിരുവനന്തപുരം: നെയ്യാറ്റിൻകരയിൽ ഡി.വൈ.എസ്.പി കാറിന് മുന്നിൽ തള്ളിയിട്ട് ഗുരുതരമായി പരിക്കേറ്റ സനലിനെ നേരിട്ട് ആശുപത്രിയിൽ കൊണ്ടു പോകുന്നതിന് മുന്പ് പോലീസ് സ്റ്റേഷനിലേക്ക് ആംബുലൻസിൽ കൊണ്ടു പോകുന്നതിന്‍റെ സിസിടിവി ദൃശ്യങ്ങൾ പുറത്തു വന്നു.
പോലീസുകാരന് ഡ്യൂട്ടി മാറുന്നതിനു വേണ്ടിയാണ് സ്റ്റേഷനിലേയ്ക്ക് കൊണ്ടു പോയതെന്ന ആക്ഷേപമാണ് ഇപ്പോൾ ഉയർന്നിരിക്കുന്നത്. ഇതിനാൽ ആശുപത്രിയിൽ എത്തിക്കാൻ കൂടുതൽ വൈകി. ഇതു കൂടാതെ പരിക്കേറ്റു കിടന്ന സനലിനെ ആശുപത്രിയിൽ കൊണ്ടു പോകുന്നതും വൈകി.
പോലീസ് സ്ഥലത്തു എത്തിയിട്ടും ആംബുലൻസ് എത്താൻ വൈകിയതും മരണത്തിന് ഇടയാക്കിയിട്ടുണ്ടെന്ന സംശയവും ഉയർന്നിട്ടുണ്ട്. അരമണിക്കൂറോളം സനൽ റോഡിൽ കിടന്നതു എസ്.ഐയുടെ സാന്നിധ്യത്തിലാണെന്ന പരാതി ബന്ധുക്കൾ ഉൾപ്പെടെ ഉന്നയിച്ചതിന്‍റെ വീഡിയോ ദൃശ്യം നേരത്തെ പുറത്തു വന്നിരുന്നു.
