സഫാരി കാറിനുള്ളിൽ ആവേശം സിനിമാ സ്റ്റൈലിൽ സ്വിമ്മിംഗ് പൂൾ ഒരുക്കി വീഡിയോ പങ്കുവച്ച യൂട്യൂബർ സഞ്ജു ടെക്കിക്കെതിരേ നടപടിയുമായ് ആർടിഒ. വണ്ടിയുടെ ആര്‍സി ബുക്ക് കാന്‍സല്‍ ചെയ്തു. ലൈസന്‍സും സസ്‌പെന്‍ഡ് ചെയ്തിട്ടുണ്ട്.
സഞ്ജുവിനെ ശിക്ഷയുടെ ഭാഗമായി മലപ്പുറത്തെ എംവിഡി കേന്ദ്രത്തില്‍ പരിശീലനത്തിനായി അയക്കും. കൂടാതെ ആശുപത്രിയില്‍ സാമൂഹ്യ സേവനത്തിന് നിയോഗിക്കുകയും ചെയ്യും.
നിരവധി ട്രിപ്പിംഗ് വീഡിയോകളിലൂടെ ആരാധകരുടെ മനം മയക്കിയ താരമാണ് സഞ്ജു. ലക്ഷക്കണക്കിനു ഫോളോവേഴ്സാണ് സഞ്ജുവിനുള്ളത്. എന്നാൽ കഴിഞ്ഞ ദിവസം കാഴ്ച്ചക്കാരുടെ എണ്ണം കൂട്ടാൻ സഞ്ജുവും സംഘവും നടത്തിയ സ്വിമ്മിംഗ് പൂൾ വീഡിയോയ്ക്കാണ് മുട്ടൻ പണി കിട്ടിയത്.
കാറിന്‍റെ പിൻഭാഗത്ത് പാസഞ്ചേഴ്സ് ഇരിക്കുന്ന സീറ്റ് അഴിച്ചുമാറ്റുകയും അവിടെ ടാർപോളിൻ വലിച്ചുകെട്ടുകയും ചെയ്തു. അതിനുശേഷം കുഴലിലൂടെ വെള്ളം നിറച്ച് കാറിനുള്ളിലേക്ക് നിറയ്ക്കുകയുമാണ് ചെയ്തത്. ഇതിനു പിന്നാലെയാണ് എംവിഡിയുടെ നടപടി.
