കോഴിക്കോട്: സന്തോഷ് ട്രോഫി ഫുട്ബോൾ ചാന്പ്യൻഷിപ്പിനുള്ള കേരള ടീമിനെ പ്രഖ്യാപിച്ചു. പരിചയ സമ്പത്തും യുവത്വവും സമന്വയിപ്പിച്ചുള്ള ഇരുപതംഗ സംഘം 72-ാമത് സന്തോഷ് ട്രോഫിയിൽ കേരളത്തിനുവേണ്ടി പൊരുതും. നാല് സന്തോഷ് ട്രോഫികളില് കേരളത്തിനായി ബൂട്ടണിഞ്ഞ തൃശൂരിന്‍റെ എസ്ബിഐ താരം രാഹുല്‍ വി.രാജാണ് ക്യാപ്റ്റന്‍.
കഴിഞ്ഞ സന്തോഷ് ട്രോഫിയില് കേരളത്തിനുവേണ്ടി കളിച്ച തിരുവനന്തപുരത്തിന്‍റെ എസ്. സീസണാണ് ഉപനായകന്‍ . ഇവരെ കൂടാതെ കഴിഞ്ഞ സന്തോഷ് ട്രോഫി കളിച്ച ലിജോ, അജ്മല്‍, മുഹമ്മദ് പറക്കോട്ടില്‍ , ശ്രീരാഗ് എന്നിവര്‍ ഇത്തവണയും ടീമില്‍ ഇടം നേടി.
മൂന്ന് സ്ട്രൈക്കര്‍മാരാണ് ടീമിലുള്ളത്. സജിത് പൗലോസ് (എസ്ബിഐ), വി.കെ. അഫ്ദല്‍ (മമ്പാട് എംഇഎസ്), അനുരാഗ് (അണ്ടര്‍ 21). ഗോള്‍കീപ്പര്‍മാരായി വി. മിഥുന്‍ (എസ്ബിഐ), എസ്. അജ്മല്‍, അഖില്‍ സോമന്‍ (ഇരുവരും കെഎസ്ഇബി)എന്നിവർ ഇടം നേടി.
എസ്ബിഐ താരങ്ങളായ എസ്.ലിജോ, രാഹുല്‍ വി. രാജ്, കേരള പോലീസിലെ വിബിന്‍ തോമസ്, വി.ജി. ശ്രീരാഗ്, ഫാറൂഖ് കോളജിന്‍റെ മുഹമ്മദ് ശരീഫ്, ജിയാദ് ഹസന്‍ (എവര്‍ഗ്രീന്‍ മഞ്ചേരി), ജസ്റ്റിന്‍ ജോര്‍ജ് (അണ്ടര്‍ 21) എന്നിവരാണ് ഡിഫന്‍ഡര്‍മാര്‍. മിഡ്ഫീല്‍ഡിലേക്ക് അണ്ടര്‍ 21 താരങ്ങളായ കെ.പി. രാഹുല്‍ , വി.എസ്. ശ്രീക്കുട്ടന്‍, എം.എസ്. ജിതിന്‍ , എസ്ബി ഐ താരം വി എസ്. സീസണ്‍, മുഹമ്മദ് പറക്കോട്ടില്‍ (കെഎസ്ഇബി), ജി. ജിതിന്‍ (ക്രൈസ്റ്റ് കോളജ് ഇരിങ്ങാലക്കുട), ബി.എല്‍. ഷംനാസ് (സെന്‍ട്രല്‍ എക്സൈസ്) എന്നിവരെയാണ് എടുത്തിരിക്കുന്നത്.
സതീവന്‍ ബാലനാണ് കോച്ച്. അസിസ്റ്റന്‍റ് കോച്ചായി ബിജേഷ് ബെന്നിയെ തെരഞ്ഞെടുത്തു. അരുണ്‍ എസ്. മനോജിനെ ടീം ഫിസിയോയായും സി.സി. ആസിഫിനെ ടീം മാനേജരായും നിയമിച്ചു. റിസർവ് താരങ്ങളായി അഞ്ച് പേര്‍ക്ക് കൂടി അവസരം നല്‍കിയിട്ടുണ്ട്.
വലിയ പ്രതീക്ഷയാണ് ഇത്തവണ ടീമിനുള്ളതെന്ന് കേരള ഫുട്ബോള്‍ അസോസിയേഷന്‍ ഭാരവാഹികള്‍ പറഞ്ഞു. ഗ്രൂപ്പ് മത്സരങ്ങളില്‍ തമിഴ്നാടിന്‍റെ ഭാഗത്ത് നിന്നാണ് വലിയ വെല്ലുവിളി പ്രതീക്ഷിക്കുന്നത്. ഓരോ മത്സരവും നിര്‍ണായകമാണെന്ന് ക്യാപ്റ്റന്‍ രാഹുലും കോച്ച് സതീവന്‍ ബാലനും വാര്‍ത്താസമ്മേളനത്തില്‍ പറഞ്ഞു.
ആദ്യ മത്സരം 18ന്
കോഴിക്കോടുനിന്ന് ഇന്ന് കൊച്ചിയിലേക്ക് തിരിക്കുന്ന ടീം കേരള ബ്ലാസ്റ്റേഴ്സിന്‍റെ റിസർവ് ടീം അടക്കം രണ്ട് ടീമുകളുമായി സൗഹൃദ, പരിശീലന മത്സരത്തിന് ശേഷം 14ന് ബംഗളൂരുവിലേക്ക് തിരിക്കും.
തമിഴ്നാട്, ആന്ധ്രപ്രദേശ്, ആന്‍ഡമാന്‍ ആൻഡ് നിക്കോബാര്‍ എന്നിവര്‍ക്കൊപ്പം ഗ്രൂപ്പ് ബിയിലാണ് കേരളമുള്ളത്. 18ന് ആന്ധ്രപ്രദേശുമായാണ് കഴിഞ്ഞ വര്‍ഷത്തെ സെമിഫൈനലിസ്റ്റായ കേരളത്തിന്‍റെ ആദ്യ മത്സരം. 20ന് ആൻഡമാന്‍ ആൻഡ് നിക്കോബാറുമായും 22ന് തമിഴ്നാടുമായും മാറ്റുരക്കും.
