കോൽക്കത്ത: സന്തോഷ് ട്രോഫി ഫുട്ബോൾ ഗ്രൂപ്പ് ബിയിലെ മത്സരങ്ങളിൽ പഞ്ചാബും ഗോവയും ജയിച്ചു. പഞ്ചാബ് 2-1നു കർണാടകയെയും ഗോവ 6-1ന് ഒഡീഷയെയുമാണ് പരാജയപ്പെടുത്തിയത്.
ജയത്തോടെ പഞ്ചാബും ഗോവയും സെമി സാധ്യത നിലനിർത്തി. ഗ്രൂപ്പിൽനിന്ന് മിസോറാം നേരത്തേ സെമിയിൽ ഇടംപിടിച്ചിട്ടുണ്ട്. ഗ്രൂപ്പിൽ മൂന്ന് മത്സരങ്ങൾ വീതം പൂർത്തിയായപ്പോൾ മൂന്ന് ജയവുമായി മിസോറാം ഒന്നാം സ്ഥാനത്താണ്. കർണാടകയ്ക്കും പഞ്ചാബിനും ആറ് പോയിന്റ് വീതവും ഗോവയ്ക്ക് മൂന്നു പോയിന്റുമാണുള്ളത്. ഗ്രൂപ്പിൽ ആദ്യ രണ്ടു സ്ഥാനക്കാരാണ് സെമിയിലേക്ക് യോഗ്യത നേടുക.
ഫൈനൽ ഗ്രൂപ്പ്ഘട്ടത്തിലെ ആദ്യ ഹാട്രിക്ക് ഗോവ-ഒഡീഷ പോരാട്ടത്തിൽ പിറന്നു. ഗോവൻ ക്യാപ്റ്റൻ വിക്ടോറിനോ ഫെർണാണ്ടസാണ് ഹാട്രിക്ക് സ്വന്തമാക്കി.
ഇന്നു കേരളം-ബംഗാൾ
ഗ്രൂപ്പ് എയിലെ അവസാന മത്സരത്തിൽ കേരളം ഇന്ന് ബംഗാളിനെ നേരിടും. മൂന്ന് ജയങ്ങൾ വീതം സ്വന്തമാക്കിയ ഇരു ടീമുകളും സെമിയിൽ പ്രവേശിച്ചുകഴിഞ്ഞതാണ്. എന്നാൽ, ഇന്നത്തെ മത്സരം ഗ്രൂപ്പ് ചാന്പ്യന്മാരെ നിർണയിക്കും. സമനിലയാണ് ഫലമെങ്കിൽ ഗോൾ ശരാശരിയിൽ മുന്നിലുള്ള കേരളം ഗ്രൂപ്പ് ചാന്പ്യന്മാരാകും. ഉച്ചകഴിഞ്ഞ് 3.00നാണ് മത്സരം.
