കുളത്തൂപ്പുഴ: വൃദ്ധമാതാവിനെ അവശതയിൽ കാവൽ മാടത്തിനുളളിൽ കണ്ടെത്തി. കുളത്തൂപ്പുഴ അമ്പതേക്കർ സരസ്വതിവിലാസത്തിൽ കൃഷ്ണൻ നാടാറിന്‍റെ ഭാര്യ സരസ്വതി(75)ആണ് വലിയേല പൊരിയൽമുക്ക് നൂൽപ്പാലത്തിന് സമീപത്തെ പാടത്തിന് നടുവിലെ ചെറ്റകുടിലിൽ കഴിയുന്നത്.
മാടത്തിനുളളിൽ നിന്നും ഞരക്കവും മൂളലും കേട്ടതിനെ തുടർന്ന് നാട്ടുകാർ എത്തി പരിശോധിച്ചപ്പോഴാണ് വൃദ്ധയെ അവശ നിലയിൽ കണ്ടെത്തിയത്. നാലു മക്കളെ വളർത്തിയെങ്കിലും അവസാനു നാളുകളിൽ ഒരാൾ പോലും സഹായത്തിനില്ലന്നാണ് ഇവർ പരിതപിക്കുന്നത്. ഭർത്താവ് കൃഷ്ണൻനാടാർ വർഷങ്ങൾക്ക് മുമ്പേ മരണപ്പെട്ടു പോയതിനെ തുടർന്ന് ആദ്യ നാളുകളിൽ മക്കളുടെ സംരക്ഷണയിലായിരുന്നു സരസ്വതി കഴിഞ്ഞിരുന്നത്.
എന്നാൽ ഏറെ നാൾ മുമ്പ് മകൻ മുരുകൻ മരത്തിന് മുകളിൽ നിന്ന് വീണ് നട്ടെല്ലിന് പൊട്ടലേറ്റ് എഴുനേൽക്കാനാവാതെ കിടപ്പിലായതോടെ ഇവരുടെ ജീവിത ദുരിതവും തുടങ്ങി. കാൻസർ രോഗ ബാധിതരായ ഇവർക്ക് ആരോഗ്യ വകുപ്പിന്‍റെ സഹായവും ലഭിക്കുന്നില്ല. പാടത്തെ കാവൽക്കാരനായ അമ്പതേക്കർ സ്വദേശി തങ്കപ്പനാണ് ഭക്ഷണവും വെളളവും നൽകി ഇവരുടെ ജീവൻ നിലനിർത്തുന്നത്.
