തിരുവനന്തപുരം: വ്യവസായിയായ ടി.സി. മാത്യുവിനു സോളാർ പാനലുകളുടെയും കാറ്റാടി യന്ത്രങ്ങളുടെ വിതരണാവകാശം നൽകാമെന്ന് പറഞ്ഞ് 1.5 കോടി രൂപ തട്ടിയെടുത്തു എന്ന കേസിൽ അഡീഷണൽ ചീഫ് ജുഡീഷൽ മജിസ്‌ട്രേറ്റ് കോടതിയിൽ അന്തിമ വാദം പൂർത്തിയായി. വിധി ഈ മാസം 13ന്. ബിജു രാധാകൃഷ്ണൻ, സരിതാ നായർ എന്നിവരാണ് കേസിലെ പ്രതികൾ. 2013ലാണ് കേസിന് ആസ്പദമായ സംഭവം.
സരിത എസ്. നായരാണ് ലക്ഷ്‌മി നായർ എന്ന പേരിൽ ആൾമാറാട്ടം നടത്തി പണം വാങ്ങിയതെന്നു വാദിഭാഗം ചൂണ്ടിക്കാട്ടി. വർഷം തോറും ഏഴ് ശതമാനം വൈദ്യുതി ഉത്പാദിപ്പിക്കാൻ കഴിയുമെന്നും അതു കൊണ്ട് മുടക്കുന്ന പണത്തിന് ഇരട്ടി വരുമാനം ലഭിക്കുമെന്നും തമിഴ്‌നാട് പ്രദേശത്ത് നിലവിൽ ധാരാളം കാറ്റാടി യന്ത്രങ്ങൾ ഉണ്ടെന്നും സരിത പറഞ്ഞു വിശ്വസിപ്പിച്ചാണ് പരാതിക്കാരന്‍റെ കൈയിൽനിന്നും പണം തട്ടിയെടുത്തത്.
ഇതിനു മുഴുവൻ ചരടുവലി നടത്തിയത് ബിജു രാധാകൃഷ്ണനായിരുന്നു എന്നും പണം മടക്കി ലഭിക്കാൻ പല പ്രമുഖ രാഷ്‌ട്രീയ നേതാക്കളും ഇടപെട്ടതായും ടി.സി. മാത്യുവിന്‍റെ അഭിഭാഷക കെ. കുസുമം കോടതിയിൽ വാദിച്ചു.
എഗ്രിമെന്‍റ് ഉണ്ടാക്കിയിരുന്നത് ടീം സോളാർ എനർജി സൊല്യൂഷൻസ് കമ്പനിയും ലിവ ബിൽഡേഴ്‌സ് ആൻഡ് പ്രോപ്പർട്ടീസ് എന്ന കമ്പനിയുമായിട്ടാണെന്നും ഇത് ഒരു സിവിൽ കേസിന്‍റെ നടപടിയിൽ വരുന്ന കേസ് മാത്രമാണെന്നും സരിതയ്ക്ക് ഒരു രാഷ്‌ട്രീയ ബന്ധവും ഇല്ലെന്നും സരിത എസ്. നായരുടെ അഭിഭാഷകൻ മറുപടി നൽകി.
