ലണ്ടൻ: ഇംഗ്ലീഷ് പ്രീമിയർ ലീഗിൽ സ്വാൻസീ സിറ്റിക്കെതിരേ സതാംപ്ടണിനു ജയം. 72-ാം മിനിറ്റിൽ മനോലോ ഗബ്ബിയാഡിനി നേടിയ ഗോളിൽ 1-0ന് ആയിരുന്നു സതാംപ്ടണിന്‍റെ ജയം. ജയത്തോടെ അടുത്ത സീസണിലും പ്രീമിയർ ലീഗ് സാന്നിധ്യം സതാംപ്ടണ്‍ ഉറപ്പിച്ചു.
സ്വാൻസീയുടെ കാര്യം ത്രിശങ്കുവിലുമായി. സതാംപ്ടണിന്‍റെ ജയത്തോടെ വെസ്റ്റ്ബ്രോംവിച്ച് ആൽബിയോണ് ലീഗിൽനിന്ന് തരംതാഴ്ത്തപ്പെട്ട് പുറത്തായി. 37 മത്സരങ്ങളിൽനിന്ന് 31 പോയിന്റുള്ള ബ്രോംവിച്ച് 19-ാം സ്ഥാനത്താണ്. അവസാന മൂന്ന് സ്ഥാനക്കാരാണ് തരംതാഴ്ത്തപ്പെടുന്നത്.
20-ാം സ്ഥാനത്തുള്ള സ്റ്റോക് സിറ്റി നേരത്തേ തരംതാഴ്ത്തപ്പെട്ടിരുന്നു. 18-ാം സ്ഥാനത്തുള്ള സ്വാൻസീ സിറ്റിക്ക് 33 പോയിന്റാണുള്ളത്. സ്റ്റോക് സിറ്റിക്കെതിരേയാണ് സ്വാൻസീയുടെ അവസാന മത്സരം.
