എടത്വ: റോഡരികിൽ കൂട്ടിയിട്ടിരുന്ന മെറ്റലിൽ കയറി നിയന്ത്രണം വിട്ട് സ്കൂൾ ബസ് മറിഞ്ഞു. തായങ്കരിക്കു സമീപം ഇന്നുരാവിലെ ഒന്പതരയോടെയായിരുന്നു അപകടം. രാമങ്കരി സഹൃദയ സ്പെഷൽ സ്കൂളിന്‍റെ ബസ് ആണ് മറിഞ്ഞത്. ബസ് ജീവനക്കാരെ കൂടാതെ 12കുട്ടികൾ ബസിൽ ഉണ്ടായിരുന്നതായാണ് വിവരം. ഇവരിൽ മൂന്നുപേരെ ചന്പക്കുളം ഗവണ്‍മന്‍റ് ആശുപത്രിയിൽ പ്രവേശിപ്പിച്ചു.
റോഡ് സൈഡിലെ മെറ്റൽ കൂനയിൽ നിന്നും മെറ്റൽ റോഡിലേക്കു പരന്നു കിടക്കുകയായിരുന്നു. ഇതിലേക്ക് ബസ് കയറിയ ഉടനെ നിയന്ത്രണം വിട്ടു മറിയുകയായിരുന്നു. ഭാഗ്യം കൊണ്ടാണ് സമീപത്തെ തോട്ടിലേക്ക് ബസ് മറിയാതിരുന്നത്. മെറ്റൽ കൂന കിടക്കുന്നതിനു സമീപം റോഡിൽ വളവുമുണ്ട്.
രാമങ്കരി, കണ്ടങ്കരി, തായങ്കരി പ്രദേശങ്ങളിലെ കുട്ടികളുമായി സ്കൂളിലേക്കു പോകുകയായിരുന്നു ബസ്. ഒരുവശം ചരിഞ്ഞു വീണതിനാൽ പല കുട്ടികളുടെയും തലയിടിച്ചു ചുണ്ടുപൊട്ടിയുമൊക്കെയാണ് പരിക്കേറ്റിരിക്കുന്നത്.
വണ്ടി ഉയർത്തി മാറ്റാൻ ജെസിബി അടക്കം എത്തിച്ചു. രാമങ്കരിഎടത്വ പോലീസും ഫയർഫോഴ്സും അടക്കം സംഭവസ്ഥലത്ത് എത്തിയിട്ടുണ്ട്.
