തിരുവനന്തപുരം : സ്കൂൾ ബസ് മോഷ്ടിച്ച കേസിൽ രണ്ടുപേരെ പോലീസ് അറസ്റ്റ് ചെയ്തു.
ശ്രീകാര്യം വെഞ്ചാവോട് സ്വദേശിനി പ്രതിഭാ മോഹന്‍റെ ഉടമസ്ഥതയിലുള്ള മേനംകുളത്ത് പ്രവർത്തിക്കുന്ന മോഹൻ മെമ്മോറിയൽ സ്കൂളിന്‍റെ ബസ് മോഷ്ടിച്ച കേസിൽ തുമ്പ പള്ളിത്തുറ ഹൗസ് നമ്പർ 136ൽ വിമോദ് (39), വലിയതുറ പുതുവൽ പുരയിടം റോസ്‌ ലിൻ ഹൗസിൽ എഡിസൺ ജോസ് (42) എന്നിവരെയാണ് കഴക്കൂട്ടം പോലീസ് അറസ്റ്റ് ചെയ്തത്.
കഴിഞ്ഞ രണ്ടു വർഷമായി മേനംകുളം ഗെയിംസ് വില്ലേജിനു സമീപം പാർക്കു ചെയ്തിരുന്ന ബസിന്‍റെ ലോക്ക് പൊളിച്ച് പ്രതികൾ മോഷ്ടിച്ചെടുക്കുകയായിരുന്നു.
പ്രത്യേക അന്വേഷണ സംഘം രൂപീകരിച്ചു നടത്തിയ അന്വേഷണത്തിലാണ് പ്രതികൾ പിടിയിലായത്. മോഷ്ടിച്ചെടുത്ത ബസ് പോലീസ് കണ്ടെടുത്തു.
കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു. സമാനമായ കൂടുതൽ മോഷണങ്ങൾ പ്രതികൾനടത്തിയിട്ടുണ്ടോ എന്നത് സംബന്ധിച്ച് പ്രതികളെ കസ്റ്റഡിയിൽ വാങ്ങി വിശദമായ അന്വേഷണം നടത്തുമെന്ന് ഡപ്യൂട്ടി കമ്മീഷണർ അങ്കിത് അശോകൻ അറിയിച്ചു.
കഴക്കൂട്ടം എസ്എച്ച്ഒ ജെ.എസ്.പ്രവീൺ, എസ്ഐമാരായ മിഥുൻ, ജിനു, സിപിഒമാരായ സജാദ്ഖാൻ, അരുൺഎസ്.നായർ, ശ്യാം എന്നിവരടങ്ങിയ പോലീസ് സംഘമാണ് പ്രതികളെ അറസ്റ്റ് ചെയ്തത്.
