അക്ഷരമാലയിൽ അമ്മ എന്ന ഗാനത്തിലൂടെ ശ്രദ്ധേയമായ സ്കൂൾ ഡയറി എന്ന ചിത്രത്തിന്‍റെ ചിത്രീകരണം തിരുവനന്തപുരത്ത് ആരംഭിച്ചു. മസ്കറ്റ് മൂവി മേക്കേഴ്സിനു വേണ്ടി അൻവർ സാദത്ത് നിർമിക്കുന്ന ഈ ചിത്രം ലൗലാന്‍റ് എന്ന ചിത്രത്തിലൂടെ ശ്രദ്ധേയനായ എം. ഹാജാമൊയ്നുവാണ് രചനയും, സംവിധാനവും നിർവ്വഹിക്കുന്നത്. സംവിധായകൻ എം. ഹാജാമൊയ്നുവിന്റെ രചനയിൽ എം.ജി. ശ്രീകുമാർ ഈണം പകർന്ന് ആലപിച്ച അക്ഷരമാലയിൽ അമ്മ എന്ന ഗാനം ചിത്രത്തിന്‍റെ ചിത്രീകരണം തുടങ്ങുന്നതിന് മുന്പ് തന്നെ ശ്രദ്ധേയമായി മാറിയിരുന്നു.
മലയാള സിനിമയിൽ ആദ്യമായി അഞ്ച് നായികമാരുമായാണ് സ്കൂൾ ഡയറി എത്തുന്നത്. നിദ്രാടനം, ദർശനം എന്നീ ചിത്രങ്ങളിലെ നായികയായിരുന്ന ഭാമ അരുണ്‍, ഹണീ ബീ ടു എന്ന ചിത്രത്തിൽ പ്രധാന വേഷം അവതരിപ്പിച്ച മമിത, കലാരംഗത്ത് കഴിവു തെളിയിച്ച അനഘ എസ്. നായർ, ദിയ, വിസ്മയ വിശ്വനാഥൻ എന്നീ അഞ്ച് നായികമാരാണ് തുല്യപ്രാധാന്യമുള്ള വേഷങ്ങളിൽ എത്തുന്നത്.
ജയരാജിന്‍റെ കാമൽ സഫാരിയിലെ നായകൻ, ഹാഷിം ഹുസൈൻ, മമ്മൂട്ടിയുടെ സഹോദരിയുടെ മകൻ അഷ്ക്കർ സൗദാൻ, ’കനലി’ എന്ന തമിഴ് ചിത്രത്തിലെ നായകൻ അൻവർ സാദത്ത് എന്നിവർ നായകന്മാരായും എത്തുന്നു. ഇന്ദ്രൻസ്, ചെന്പിൽ അശോകൻ എന്നിവരും പ്രധാന വേഷത്തിലെത്തുന്നു. ഹാഷീം ഹുസൈൻ, അഷ്ക്കർ സൗദാൻ, അൻവർ സാദത്ത്, ഇന്ദ്രൻസ്, ചെന്പിൽ അശോകൻ, ബാലാജി ശർമ്മ, മോഹൻ ഐരൂർ, മുഹമ്മദ് നൗഫൽ, ഗൗതം രാജീവ്, സൽമാൻ സലിം, ഗോകുൽ, അഭിലാഷ്, ആന്‍റണി അറ്റ് ലസ്, റാഷിദ്, ഭാമ അരുണ്‍, ദിയ, മമിത, അനഘ എസ്. നായർ, വിസ്മയ വിശ്വനാഥ്, റീന ബഷീർ, പൂജ, കല്യാണി, ബേബി നേഹ എന്നിവർ അഭിനയിക്കുന്നു.
-അയ്മനം സാജൻ
