ടൂവീലറില്‍ ഫ്രീക്ക് പിള്ളേര്‍ അഭ്യാസം കാണിച്ച് പോവുന്ന കാഴ്ച നിത്യേനയെന്ന വണ്ണം നാം കാണാറുള്ളതാണ്. ആരോഗ്യവും യുവത്വത്തിന്റെ പ്രസരിപ്പുമുള്ള അക്കൂട്ടരുടെ അഭ്യാസ പ്രകടനം ആരിലും അധികം കൗതുകം ഉണര്‍ത്താറില്ല. എന്നാല്‍ ടൂവീലറിലെ ചില അഭ്യാസ പ്രകടനങ്ങളിലൂടെ ലോകം മുഴുവന്‍ ആരാധകരെ സമ്പാദിച്ചിരിക്കുകയാണ് മധ്യവയസ്‌കനായ ഒരു ചേട്ടന്‍.
സമൂഹമാധ്യമങ്ങളിലൂടെ പ്രചരിക്കുന്ന ഒരു വീഡിയോയിലൂടെയാണ് സ്‌കൂട്ടറില്‍ ചേട്ടന്‍ നടത്തുന്ന അഭ്യാസങ്ങള്‍ ലോകം കണ്ടത്. ഹെല്‍മറ്റോ മറ്റ് സുരക്ഷാസംവിധാനങ്ങളോ ഇല്ലാത്തതിന്റെ പേരില്‍ വിമര്‍ശനങ്ങള്‍ ഉയരുന്നുണ്ടെങ്കിലും കൗതുകവും ചിരിയും ഉണര്‍ത്തുന്ന ചേട്ടന്റെ അഭ്യാസം ആളുകള്‍ ഏറ്റെടുത്ത് കഴിഞ്ഞു.
തന്റെ ചെറു സ്‌കൂട്ടറിലാണ് അഭ്യാസം കാണിക്കുന്നത്. കാലുകൊണ്ട് ഹാന്‍ഡില്‍ നിയന്ത്രിക്കുക, എഴുന്നേറ്റ് നിന്നു സ്‌കൂട്ടറോടിക്കുക, ചാരിക്കിടക്കുക തുടങ്ങിയ നിരവധി വേലകളാണ് കാണിക്കാന്‍ ശ്രമിക്കുന്നത്. അഭ്യാസത്തിനെ ആളുകളുടെ കൈയ്യടിയും പ്രോത്സാഹനവും കൂടിയായപ്പോള്‍ ആവേശം വീണ്ടും കൂടി.
എന്നാല്‍ അവസാനം പണി അല്‍പ്പം പാളി റോഡില്‍ വീണുപോയി. അവസരം മുതലെടുത്ത കാണികള്‍ കൂക്കി വിളിച്ചു. പക്ഷേ അതുകൊണ്ടൊന്നും തളര്‍ന്നില്ല. റോഡില്‍ നിന്നു എഴുന്നേറ്റ് ഡാന്‍സ്. കാഴ്ചക്കാരില്‍ മുഴുവന്‍ ചിരി വിടര്‍ത്തും ഈ വിഡിയോ.
ഇത്തരത്തിലുള്ള അഭ്യാസപ്രകടനങ്ങള്‍ റോഡില്‍ പാടില്ലെന്ന് കര്‍ശന നിയമമുള്ളതാണെന്ന് ഒരു കൂട്ടര്‍ വാദിക്കുമ്പോള്‍ ചേട്ടന്റെ പ്രകടനം ഗ്രൗണ്ടിലാണെന്ന് ഒരുകൂട്ടം വാദിക്കുന്നുമുണ്ട്.
