മാഞ്ചസ്റ്റര്‍: സ്വന്തം തട്ടകമായ ഓൾഡ് ട്രാഫോഡിൽ കളിമറന്ന മാഞ്ചസ്റ്റർ യുണൈറ്റഡ് ബാഴ്സലോണയ്ക്ക് ചരിത്ര ജയം സമ്മാനിച്ചു. ചാമ്പ്യന്‍സ് ലീഗ് ഫുട്ബോൾ ക്വാര്‍ട്ടര്‍ ഫൈനലിന്‍റെ ആദ്യ പാദത്തില്‍ ബാഴ്സലോണയ്ക്ക് 1-0ന്‍റെ ജയം.
ലൂക്ക് ഷായുടെ സെല്‍ഫ് ഗോളാണ് ബാഴ്സലോണയ്ക്ക് നിര്‍ണായകമായ എവേ ജയമൊരുക്കിയത്. ഒരു യൂറോപ്യന്‍ ടൂര്‍ണമെന്‍റില്‍ ഓള്‍ഡ് ട്രാഫോഡില്‍ ബാഴ്‌സലോണയുടെ ആദ്യ ജയമാണ്.
12-ാം മിനിറ്റില്‍ ലുയി സുവാരസിന്‍റെ ഹെഡര്‍ ഷായുടെ ദേഹത്തു‍തട്ടി വലയില്‍ പതിച്ചു. ലൈൻ റഫറി ആദ്യം ഓഫ് സൈഡ് വിളിച്ചു ഗോള്‍ നിഷേധിച്ചു. എന്നാല്‍, വിഎആറിലൂടെ ഗോളുറപ്പിക്കുകയായിരുന്നു.
പ്രീക്വാര്‍ട്ടറില്‍ പാരീ സാന്‍ ഷെര്‍മയിനോട് ഓൾഡ് ട്രാഫോഡിൽ ആദ്യപാദത്തില്‍ തോറ്റശേഷം പാരീസിലെ ജയത്തോടെ യുണൈറ്റഡ് തിരിച്ചുവന്നിരുന്നു. എന്നാല്‍, പിഎസ്ജിയെക്കാള്‍ കരുത്തരായ ബാഴ്‌സലോണയെ അവരുടെ തട്ടകമായ ന്യൂകാമ്പില്‍ നേരിടാനിറങ്ങുമ്പോള്‍യുണൈറ്റഡിന് വലിയ പോരാട്ടം പുറത്തെടുത്താല്‍ മാത്രമേ അടുത്ത ഘട്ടം കാണാനാകു. 2013നുശേഷം ബാഴ്‌സലോണ സ്വന്തം ഗ്രൗണ്ടില്‍ ചാമ്പ്യന്‍സ് ലീഗ് മത്സരങ്ങളില്‍ തോല്‍വി വഴങ്ങിയിട്ടുമില്ല.
