കാലിഫോർണിയ: അമ്മയായ ശേഷമുള്ള ആദ്യ ടൂർണമെന്‍റിൽതന്നെ കിരീടം ലക്ഷ്യമിടുന്ന സെറീന വില്യംസിനു സഹോദരിയുടെ വെല്ലുവിളി. ബിഎൻപി പാരിബാസ് (ഇന്ത്യൻ വെൽസ്) ഓപ്പൺ മൂന്നാം റൗണ്ടിൽ സെറീനയെ ചേച്ചി വീനസ് വില്യംസ് നേരിടും.
പതിനാലുമാസത്തെ ഇടവേളയ്ക്കു ശേഷം കോർട്ടിൽ തിരിച്ചെത്തിയ സെറീന രണ്ടാം റൗണ്ടിലും അനായാസ ജയമാണ് സ്വന്തമാക്കിയത്. ഡച്ച് താരം കികി ബെർട്ടെൻസിനെയാണ് സെറീന പരാജയപ്പെടുത്തിയത്. നേരിട്ടുള്ള സെറ്റുകൾക്കായിരുന്നു സെറീനയുടെ വിജയം. സ്കോർ: 7-6 (7-5), 7-5.
2017 ഓസ്ട്രേലിയൻ ഓപ്പണിലായരുന്നു സഹോദരങ്ങൾ അവസാനമായി ഏറ്റുമുട്ടിയത്. ചേച്ചിയെ പരാജയപ്പെടുത്തി കിരീടം സ്വന്തമാക്കിയ സെറീന പിന്നീട് കുഞ്ഞിനു ജന്മം നൽകാനായി കോർട്ടിൽനിന്നും നീണ്ട ഇടവേളയെടുക്കുകയായിരുന്നു.
വീനസ് രണ്ടാം റൗണ്ടിൽ റൊമാനിയയുടെ കിർസ്റ്റ്യയെ ആണ് പരാജയപ്പെടുത്തിയത്. നേരിട്ടുള്ള സെറ്റുകൾക്കായിരുന്നു വീനസും എതിരാളിയെ വീഴ്ത്തിയത്. സ്കോർ: 6-3, 6-4.
