ലക്നോ: സ്വാതന്ത്ര്യ ലബ്ധിക്കു ശേഷം ഒരു സ്ത്രീയെ ആദ്യമായി തൂക്കിലേറ്റാനൊരുങ്ങുന്പോൾ അവളെ കഴുമരത്തിന് അർഹയാക്കിയത് കൊടും ക്രൂരത.
കൊടും ക്രിമിനലുകൾ പോലും ചെയ്യാൻ മടിക്കുന്ന കാര്യമാണ് ഷബ്നം എന്ന ഉന്നത വിദ്യാഭ്യാസമുള്ള പെൺകുട്ടിയും കാമുകനും ചേർന്നു നടത്തിയത്. എഴു പേരെ അതിനിഷ്ഠുരമായി വകവരുത്തി, അതും സ്വന്തം കുടുംബാംഗങ്ങളെ തന്നെ.
കാമം തലയ്ക്കുപിടിച്ചാൽ ചില മനുഷ്യർ ഏതു ക്രൂരതയ്ക്കും മടിക്കില്ല എന്നതിന്‍റെ ഉദാഹരണമാണ് യുപിയിൽ അരങ്ങേറിയ ഈ കൂട്ടക്കൊല.
ഇരട്ട ബിരുദാനന്തര ബിരുദമുള്ള ഒരു സ്കൂളിൽ അധ്യാപികയായിരുന്ന പെൺകുട്ടിയാണ് ഇത്തരമൊരു കൂട്ടക്കൊലയ്ക്കു പങ്കു ചേർന്നത് എന്നതാണ് നീതിപീഠത്തെപ്പോലും ഞെട്ടിച്ചത്.
കോടാലിക്കു വെട്ടി
സ്വന്തം കുടുംബത്തിലെ ഏഴു പേരെ വെട്ടിക്കൊന്ന കേസിൽ യുപി സ്വദേശിനി ഷബ്നത്തിന്‍റെ വധശിക്ഷ നടപ്പാക്കാനാണ് ഒരുക്കം തുടങ്ങിയിരിക്കുന്നത്. 2008 ഏപ്രിലിൽ ഉത്തർപ്രദേശിലെ അംറോഹ ജില്ലയിലെ ഭവൻഖേദി ഗ്രാമത്തിലായിരുന്നു രാജ്യത്തെ നടുക്കിയ കൊടും ക്രൂരത അരങ്ങേറിയത്.
ഷബ്നവും കാമുകൻ സലിമും ചേർന്നു ഷബ്നത്തിന്‍റെ കുടുംബത്തിലെ ഏഴു പേരെ കോടാലികൊണ്ടു വെട്ടിക്കൊലപ്പെടുത്തിയെന്നാണ് കേസ്. മാതാപിതാക്കൾ, രണ്ടു സഹോദരന്മാർ, സഹോദരന്‍റെ ഭാര്യ, സഹോദരി, മരുമകൻ എന്നിവരെയാണു കൊലപ്പെടുത്തിയത്.
കുടുംബാംഗങ്ങൾക്കു പാലിൽ മയക്കുമരുന്നു ചേർത്തു നല്കിയശേഷമായിരുന്നു കൊടുംക്രൂരത. സലിമുമായുള്ള ബന്ധത്തെ വീട്ടുകാർ എതിർത്തതാണു കുടുംബാംഗങ്ങളോടു അടങ്ങാത്ത പക തോന്നാൻ ഇടയ്ക്കിയത്.
ദയാഹർജിയും തള്ളി
കേസിൽ അറസ്റ്റിലായ ഷബ്നത്തിനും സലീമിനും 2010 ജൂലൈയിൽ ജില്ലാ കോടതി വധശിക്ഷ വിധിച്ചു. ഇതിനെതിരേ സുപ്രീംകോടതിയെ സമീപിച്ചെങ്കിലും സുപ്രീംകോടതിയും ശിക്ഷ ശരിവച്ചു.
ഒടുവിൽ രാഷ്‌ട്രപതിക്കു നല്കിയ ദയാഹർജിയും തള്ളി. ഇതോടെയാണു പ്രതികളുടെ ശിക്ഷ നടപ്പാക്കാനുള്ള നടപടിക്രമങ്ങൾ ആരംഭിച്ചത്. ഷബ്നം ബറേലി ജയിലിലും സലിം ആഗ്ര ജയിലിലുമാണ്.
മഥുരയിൽവച്ചാകും ഷബ്നത്തിന്‍റെ വധശിക്ഷ നടപ്പാക്കുകയെന്നാണു റിപ്പോർട്ട്. വനിതകളുടെ വധശിക്ഷ നടപ്പാക്കുന്ന ഏക ജയിൽ മഥുരയിലേതാണ്. 1870ൽ ബ്രിട്ടീഷ് ഭരണകാലത്തു പണിത ഇവിടെ സ്വാതന്ത്ര്യത്തിനു ശേഷം ആരെയും തൂക്കിലേറ്റിയിട്ടില്ല.
1947നുശേഷം ഇന്ത്യയിൽ വധശിക്ഷയ്ക്കു വിധേയയാകുന്ന ആദ്യ വനിത ഷബ്നമായിരിക്കുമെന്നാണു ജയിൽ അധികൃതർ പറയുന്നത്.
തടവിൽ പ്രസവം
അറസ്റ്റിലാകുന്പോൾ ഷബ്നം ഏഴു മാസം ഗർഭിണിയായിരുന്നു. 2008 ഡിസംബറിൽ ഇവർ ആണ്‍കുഞ്ഞിനു ജന്മം നല്കി. ഇംഗ്ലീഷിലും ജോഗ്രഫിയിലും ബിരുദാനന്തര ബിരുദമുള്ള ഷബ്നം ഗ്രാമത്തിലെ പ്രൈമറി സ്കൂളിൽ അധ്യാപികയായിരുന്നു.
സലിം നാലാം ക്ലാസിൽ പഠനം ഉപേക്ഷിച്ചയാളാണ്. ഇയാൾ ഷബ്നത്തിന്‍റെ വീടിനടുത്തുള്ള തടിമില്ലിൽ ജോലി ചെയ്യുകയായിരുന്നു.നിർഭയ കേസിലെ പ്രതികളെ തൂക്കിലേറ്റിയ പവൻ ജല്ലാദ് തന്നെയാകും ഷബ്നത്തെയും തൂക്കിലേറ്റുക.
ശിക്ഷ നടപ്പാക്കുന്നതിനു മുന്നോടിയായി പവൻ രണ്ടു തവണ മഥുര ജയിലിലെത്തി നടപടിക്രമങ്ങൾ പരിശോധിച്ചു. ഇദ്ദേഹത്തിന്‍റെ നിർദേശപ്രകാരം കഴുമരത്തിന്‍റെ ചില ഭാഗങ്ങളിൽ അറ്റകുറ്റപ്പണി നടത്തിയിട്ടുണ്ട്. ബിഹാറിലെ ബക്സറിൽനിന്നുള്ള തൂക്കുകയറും മഥുര ജയിലിൽ എത്തിച്ചിട്ടുണ്ട്.
