വെഞ്ഞാറമൂട്: പിതാവിനെ മകൻ വെടിവച്ചതായി പരാതി. വെഞ്ഞാറമൂട് കോട്ടുകുന്നം ദിലീപ് ഭവനിൽ സുകുമാരപിള്ള (65)ആണ് വെടിയേറ്റത്.കഴിഞ്ഞ ദിവസം രാവിലെ 10.30 നാണ് സംഭവം. സംഭവത്തെ കുറിച്ച് പോലീസ് പറയുന്നതിങ്ങനെ സുകുമാരപിള്ളയും ഭാര്യയും ഇളയ മകൻ കുഞ്ഞുമോനൊപ്പം കോട്ടുകുന്നത്താണ് താമസിക്കുന്നത്.
മറ്റൊരു വീട്ടിൽ താമസിക്കുന്ന മൂത്ത മകൻ ദിലീപ് കഴിഞ്ഞ ദിവസം രാവിലെ സുകുമാരപിള്ള താമസിക്കുന്ന വീട്ടിൽ എത്തുകയും കൃഷിയിടത്തിൽ കൃഷിപ്പണിയിലേർപ്പിട്ടിരുന്ന പിതാവിനെ എയർ ഗൺ ഉപയോഗിച്ച് വെടി വയ്ക്കുകയുമായിരുന്നു.
ഇടത് കൈയ്ക്ക് വെടിയേറ്റ സുകുമാരപിള്ളയെ ആദ്യം കന്യാകുളങ്ങര കമ്യൂണിറ്റി ഹെൽത്ത് സെന്‍ററിലും തുടർന്നു മെഡിക്കൽ കോളജ് ആശുപത്രിയിലും പ്രവേശിപ്പിച്ചു. വെടി വച്ച ഉടൻ ഓടി രക്ഷപ്പെട്ട ദിലീപിന് വേണ്ടി പോലിസ് തെരച്ചിൽ ആരംഭിച്ചു.
സ്വത്ത് തർക്കമാണ് ക്യത്യത്തിന് പിന്നിലെന്ന് പോലീസ് പറയുന്നു.അബ്കാരി കേസ്, വന്യമൃഗങ്ങളെ തോക്ക് ഉപയോഗിച്ച് വേട്ടയാടൽ തുടങ്ങി നിരവധി കേസുകളിലെ പ്രതിയാണ് ദിലീപ്.
