തിരുവനന്തപുരം: കണ്ണൂരിൽ സിപിഎം അക്രമത്തിൽ കോണ്ഗ്രസ് പ്രവർത്തകൻ ഷുഹൈബ് കൊല്ലപ്പെട്ട സംഭവം സിബിഐ അന്വേഷിക്കേണ്ടതില്ലെന്ന് വാദിക്കാൻ സംസ്ഥാന സർക്കാർ ചെലവാക്കിയത് 34 ലക്ഷം രൂപ. പിണറായി സർക്കാർ അധികാരത്തിൽ വന്നശേഷം ഏറ്റവും കൂടുതൽ തുക ചെലവാക്കിയ കേസു കൂടിയാണിത്.
ഷുഹൈബിന്‍റെ പിതാവ് സിബിഐ അന്വേഷണം ആവശ്യപ്പെട്ട് ഹൈക്കോടതിയിൽ നൽകിയ ഹർജിയെ എതിർക്കാനാണ് വിജയ് ഹൻസാരി, അമരേന്ദ്ര ശരണ്‍ എന്നീ അഭിഭാഷകരെ സർക്കാർ കേരളത്തിനു പുറത്തുനിന്ന് കൊണ്ടുവന്നത്.
വിജയ് ഹൻസാരെയ്ക്ക് 12,20,000 രൂപ നൽകി. അമരേന്ദ്ര ശരണിന് ഫീസായി അനുവദിച്ച 22 ലക്ഷം രൂപ കൈമാറിയിട്ടില്ല. സർക്കാർ ഏറ്റവും കൂടുതൽ തുക ചെലവാക്കിയ കേസ് ഏതെന്ന സണ്ണി ജോസഫിന്റെ ചോദ്യത്തിനാണ് മന്ത്രി എ.കെ. ബാലൻ മറുപടി നൽകിയത്. വാദിഭാഗത്തിനൊപ്പം നിൽക്കേണ്ട സർക്കാർ പ്രതിഭാഗം ചേർന്ന് നികുതിപ്പണം കൊള്ളയടിക്കുകയാണെന്ന് പ്രതിപക്ഷം ആരോപിച്ചു.
