കേട്ടറിവിനേക്കാൾ വലുതാണ് മുരുകനെന്ന സത്യം… പുലിമുരുകനിലെ പ്രശസ്തമായ ഈ ഡയലോഗിനെ അനുകരിച്ച് ദിലീപ്. ആക്ഷൻ കോറിയോഗ്രാഫർ പീറ്റർ ഹെയ്ന് ഒപ്പമുള്ള ചിത്രം സോഷ്യൽ മീഡിയയിൽ പങ്കുവച്ചുകൊണ്ടാണ് ദിലീപ് പുലിമുരുകനിലെ ഡയലോഗിനെ അനുകരിച്ച് കേട്ടറിവിനേക്കാൾ വലുതാണ് പീറ്റർ ഹെയ്ൻ എന്ന സത്യം എന്ന് കുറിച്ചിരിക്കുന്നത്. ഫേസ്ബുക്കിലാണ് ദിലീപ് ചിത്രം പങ്കു വച്ചിരിക്കുന്നത്.
ദിലീപിന്‍റേതായി റിലീസ് ചെയ്യാൻ പോകുന്ന ജാക്ക് ആൻഡ് ഡാനിയേലിന്‍റെ ആക്ഷൻ കോറിയോഗ്രാഫർ പീറ്റർ ഹെയ്ൻ ആണ്. കനൽക്കണ്ണൻ, സുപ്രീം സുന്ദർ എന്നിവരും ഈ ചിത്രത്തിന്‍റെ ആക്ഷൻ കോറിയോഗ്രഫിയിൽ പീറ്ററിനൊപ്പം പങ്കാളിയാകുന്നു. എസ്.എൽ പുരം ജയസൂര്യയാണ് ചിത്രം തിരക്കഥയെഴുതി സംവിധാനം ചെയ്യുന്നത്.
തമിഴ് സൂപ്പർതാരം അർജുൻ ഈ ചിത്രത്തിൽ മറ്റൊരു പ്രധാന വേഷം ചെയ്യുന്നു. സ്പീഡ് ട്രാക്ക് എന്ന ചിത്രത്തിനുശേഷം എസ്എൽ പുരം ജയസൂര്യ ദിലീപിനെ നായകനാക്കുന്ന ചിത്രമാണ് ജാക്ക് ആൻഡ് ഡാനിയൽ. ഷിബു തമീൻസ് ആണ് ചിത്രം നിർമിക്കുന്നത്.
