അധ്യാപക ദിനത്തിൽ ഹൃദയം തൊടുന്ന കുറിപ്പുമായി നടി ശിവദ. തന്‍റെ അച്ഛനെ പഠിപ്പിച്ച അധ്യാപികയെ കാണാൻ അച്ഛനോടും മകളോടുമൊപ്പം പോകുന്ന വീഡിയോയാണ് ശിവദ ഇൻസ്റ്റഗ്രാമിൽ പങ്ക് വച്ചിരിക്കുന്നത്. താൻ പഠിപ്പിച്ച വിദ്യാർഥിയെ വർഷങ്ങൾക്കുശേഷം വീണ്ടും കണ്ടപ്പോഴുള്ള അധ്യാപികയുടെ കണ്ണുകളിലെ സന്തോഷവും വീഡിയോയിൽ കാണാം.
അച്ഛൻ തന്‍റെ ജന്മനാടായ ഷൊർണൂർ കാരക്കാട് വരുമ്പോഴെല്ലാം കാരക്കാട് എൽപി സ്കൂളിലെ പ്രധാനാധ്യാപികയെ സന്ദർശിക്കുന്നത് പതിവാണ്. ഇത്തവണ 94 വയസുള്ള പാറുക്കുട്ടി അമ്മയെ കാണാൻ ഞങ്ങൾ അദ്ദേഹത്തോടൊപ്പം പോയി.
അവർ തമ്മിലുള്ള അഗാധമായ ബന്ധത്തിന് സാക്ഷ്യം വഹിച്ചത് ശരിക്കും ഹൃദയസ്പർശിയായിരുന്നു. അവരുടെ കണ്ണുകളിലെ സന്തോഷം, അവരുടെ പുഞ്ചിരിയിലെ ഊഷ്മളത – വർഷങ്ങൾക്ക് ശേഷവും അവരുടെ വിദ്യാർഥികളെ കാണാൻ സാധിക്കുന്നതിൽ ഭാഗ്യവതിയാണ്. ഈ അധ്യാപക ദിനത്തിൽ, ഒരു അധ്യാപകനാകുന്നത് എത്രമാത്രം അനുഗ്രഹീതമാണെന്ന് ഞാൻ ഓർമിപ്പിക്കുന്നു എന്നും ശിവദ കുറിച്ചു.
