ദുബായിൽ നിന്ന് കൊൽക്കത്തയിലേക്കുള്ള ഇൻഡിഗോ വിമാനത്തിന്‍റെ ശുചിമുറിയിൽ പുകവലിച്ചതിനെ തുടർന്ന് കൊൽക്കത്തയിലെ നേതാജി സുഭാഷ് ചന്ദ്രബോസ് അന്താരാഷ്ട്ര വിമാനത്താവളത്തിൽ യാത്രക്കാരനെ അറസ്റ്റ് ചെയ്തു.
പ്രതിയായ സുവം ശുക്ല ശുചിമുറിയിൽ കയറി പുകവലിക്കുന്നത് വിമാനത്താവളത്തിലെ ഉദ്യോഗസ്ഥൻ കണ്ടു. ക്യാബിൻ ക്രൂവും ഒരു സഹയാത്രികനും ഇത് ശ്രദ്ധിക്കുകയും വിമാനത്തിന്‍റെ പൈലറ്റിനെ വിവരമറിയിക്കുകയും തുടർന്ന് വിമാനം ലാൻഡ് ചെയ്യുകയും ചെയ്തു.
വിമാന ഉദ്യോഗസ്ഥൻ ഉടൻ തന്നെ എയർപോർട്ട് സെക്യൂരിറ്റി ജീവനക്കാരെയും വിമാനത്താവളത്തിലെ സുരക്ഷാ ക്രമീകരണങ്ങൾക്കായി നിയോഗിച്ചിരുന്ന സെൻട്രൽ ഇൻഡസ്ട്രിയൽ സെക്യൂരിറ്റി ഫോഴ്സ് ഉദ്യോഗസ്ഥരെയും ബന്ധപ്പെട്ടു. ഉടൻ തന്നെ യാത്രക്കാരനെ അറസ്റ്റ് ചെയ്തു.
സിഐഎസ്എഫ് ഉദ്യോഗസ്ഥർ ശുക്ലയെ ചോദ്യം ചെയ്യുകയും ഒടുവിൽ ബിധാനഗർ സിറ്റി പോലീസിന് കീഴിലുള്ള എയർപോർട്ട് പോലീസ് സ്റ്റേഷനിലെ പോലീസുകാർക്ക് കൈമാറുകയും ചെയ്തു.1937ലെ എയർക്രാഫ്റ്റ് റൂൾസിലെ സെക്ഷൻ 25 പ്രകാരമാണ് ഇയാൾക്കെതിരെ കേസെടുത്തിരിക്കുന്നത്.
യാത്രക്കാരുടെ സുരക്ഷ കണക്കിലെടുത്ത് വിമാനത്തിൽ പുകവലി പൂർണമായും നിരോധിച്ചിട്ടുണ്ടെന്ന് ഇൻഡിഗോ എയർലൈൻസ് അധികൃതർ അറിയിച്ചു. ഭാഗ്യവശാൽ യാത്രക്കാരൻ പുകവലിക്കുന്നത് യഥാസമയം ശ്രദ്ധയിൽപ്പെട്ടതിനാൽ നടപടിയെടുത്തെന്നും അല്ലെങ്കിൽ അത് അപകടത്തിന് ഇടയാക്കിയേക്കുമെന്നും അവർ പറഞ്ഞു.
