വന്യമൃഗങ്ങളെ തൊടാന്‍ തന്നെ പലര്‍ക്കും പേടിയാണ് എന്നാല്‍ വന്യമൃഗങ്ങളുമായി സാഹസ പ്രകടനത്തിനു ശ്രമിക്കുന്ന നിരവധി ആളുകള്‍ വേറെയുമുണ്ട്.
മൃഗങ്ങളെ പ്രദര്‍ശനത്തിന് വച്ച് അവരോടൊപ്പം ഫോട്ടോയെടുക്കുന്നതിന് പണം വാങ്ങുന്ന നിരവധി സ്ഥലങ്ങള്‍ ലോകത്തിന്റെ വിവിധ ഭാഗങ്ങളിലുണ്ട്.
ചില സമയങ്ങളില്‍ കാണികള്‍ക്ക് തൊടാനും ചുംബിക്കാനും പക്ഷിമൃഗാദികള്‍ക്കൊപ്പം ഫോട്ടോയെടുക്കാനുമുള്ള അവസരവും ഇവര്‍ ഒരുക്കാറുണ്ട്.
അത്തരത്തില്‍ ഒരു സംഭവമാണ് ഇപ്പോള്‍ സമൂഹമാധ്യമങ്ങളില്‍ ചര്‍ച്ചാവിഷയം. ഏതാനും വര്‍ഷങ്ങള്‍ക്കു മുമ്പ് ആരോ പങ്കുവെച്ചതാണ് ഈ വീഡിയോ.
പ്രദര്‍ശനത്തിനുവച്ച പാമ്പിനെ ചുംബിക്കാന്‍ നോക്കിയ യുവതിയുടെ ചുണ്ടില്‍ പാമ്പ് കടിച്ചു പിടിച്ചിരിക്കുന്നതിന്റെ വീഡിയോയാണ് ഇപ്പോള്‍ വീണ്ടും വൈറലാകുന്നത്.
പെരുമ്പാമ്പിനെ രണ്ടുപേര്‍ ചേര്‍ന്ന് തോളില്‍ തൂക്കിയിട്ടുണ്ട്. പാമ്പിനെ കാണാനും തൊടാനുമായി യുവതി അടുത്തേക്ക് വരുന്നത് വീഡിയോയില്‍ കാണാം.
തുടര്‍ന്ന് പെണ്‍കുട്ടിക്ക് പാമ്പിനെ ചുംബിക്കാനുള്ള അനുമതി പ്രദര്‍ശകര്‍ നല്‍കുകയായിരുന്നു. ഈ സമയം പരിശീലകന്‍ പാമ്പിന്റെ കഴുത്തില്‍പിടിത്തമിട്ടിരുന്നു.
എന്നാല്‍ യുവതി ചുംബിച്ച് മാറുന്നതിനിടെ പെട്ടെന്ന് പാമ്പ് തിരിയുകയും അവളുടെ ചുണ്ടില്‍ കടിച്ചുപിടിക്കുകയും ചെയ്തു. ഉടന്‍തന്നെ പരിശീലകന്‍ ഇടപെട്ട് പാമ്പിനെ മാറ്റുകയായിരുന്നു.
സംഭവം എവിടെനിന്നാണെന്ന് വ്യക്തമല്ലെങ്കിലും നിമിഷനേരം കൊണ്ട് ലക്ഷങ്ങളാണ് വിഡിയോ കണ്ടത്. കാഴ്ചക്കാരായി നില്‍ക്കാതെ പാമ്പിനെ ചുംബിക്കാന്‍ പോയത് തെറ്റാണെന്ന് വീഡിയോ കണ്ട ചിലര്‍ അഭിപ്രായപ്പെട്ടു.
കടിയേറ്റ ആ പെണ്‍കുട്ടി ഇപ്പോള്‍ ജീവിച്ചിരിക്കുന്നുണ്ടോ എന്നും ചിലര്‍ ചോദിക്കുന്നുണ്ട്. എന്നാല്‍ പെണ്‍കുട്ടിയുടെ ധൈര്യത്തെ അഭിനന്ദിച്ചും ചിലര്‍ കമന്റുകള്‍ ഇടുന്നുണ്ട്.
വീഡിയോ കടപ്പാട് : എബിപി ന്യൂസ്‌
