തന്‍റെ ആടിനെ ചുറ്റി വരിഞ്ഞ പെരുന്പാന്പിനെ വീട്ടമ്മ വെടിവച്ച് കൊല്ലുന്ന വൈറൽ വീഡിയോ എല്ലാവരും കണ്ടിരുന്നു എന്നാലിതാ ഒരു ആടിനെ മുഴുവൻ വഴുങ്ങിയ പെരുന്പാന്പ് അനങ്ങാൻ പറ്റാതെ കിടക്കുന്ന വീഡിയോ സോഷ്യൽ മീഡിയായിൽ വ്യാപകമായി പ്രചരിക്കുകയാണ്.
ആസാമിലെ ബൈഹതാ ചരിയാലി എന്ന ഗ്രാമത്തിലാണ് ഈ സംഭവം നടക്കുന്നത്. 15 അടി നീളമുള്ള ഭീമൻ പെരുന്പാന്പ് വിശന്നു വലഞ്ഞ് കിടക്കുന്പോളാണ് ഒരു ആടിനെ കണ്ണിൽ പെടുന്നത്. രണ്ടാമതൊന്ന് ആലോചിക്കാതെ ഈ ആടിനെ ആർത്തി മൂത്ത് വിഴുങ്ങുകയും ചെയ്തു. ആടിനെ അകത്താക്കി കഴിഞ്ഞപ്പോഴാണ് പണി പാളി എന്ന് പാന്പിന് മനസിലായത്. ഒന്ന് അനങ്ങാൻ പോലും പറ്റാതെ പെരുന്പാന്പ് പെട്ടു പോയി.
പെരുന്പാന്പിനെ കണ്ടെത്തിയ പ്രദേശവാസികൾ പാന്പിന്‍റെ കഴുത്തിൽ കരുക്കിട്ട് പിടികൂടുകയായിരുന്നു. പെരുന്പാന്പിനു ചുറ്റും നിന്ന് ആളുകൾ ചിത്രങ്ങൾ പകർത്താൻ ശ്രമിക്കുന്നതും വീഡിയോയിൽ കാണാൻ സാധിക്കുന്നുണ്ട്. വനം വകുപ്പ് അധികൃതർ എത്തി പെരുന്പാന്പിനെ ലോറിയിൽ കയറ്റി കാട്ടിലേക്ക് തുറന്നു വിടുകയായിരുന്നു.
