കാൻബറ: വീടിനുള്ളില്‍ ഒരു പാമ്പിനെ കണ്ടാല്‍ എന്തു ചെയ്യും? ഇറങ്ങി ഓടുകയായിരിക്കും ഭൂരിഭാഗവും ചെയ്യുക. എന്നാല്‍, ഓസ്ട്രേലിയക്കാരിയായ ഒരു യുവതി വീടിനുള്ളിൽ കയറിയ രണ്ടു കൂറ്റൻ പാന്പുകളെ കൈകാര്യംചെയ്യുന്നതു കണ്ടാൽ അന്ധാളിച്ചു പോകും. Insane Reality Leaks എന്ന ട്വിറ്റര്‍ ഉപയോക്താവാണ് ഇതിന്‍റെ വീഡിയോ പങ്കുവച്ചത്.
ഒരു മേശപ്പുറത്തു കയറിനിന്നു വീടിന്‍റെ മച്ചിലേക്കു തുറക്കുന്ന ദ്വാരത്തിലൂടെ യുവതി വടികൊണ്ട് കുത്തുന്ന കാഴ്ചയില്‍നിന്നാണ് വീഡിയോ തുടങ്ങുന്നത്. പിന്നാലെ ഒരു പാമ്പിന്‍റെ ഭാഗങ്ങൾ പുറത്തേക്കു വരുന്നു.
അതിന്‍റെ തലയില്‍ പിടിക്കുന്നതോടെ പാമ്പ് യുവതിയെ കൈയിൽ ചുറ്റുന്നു. അതിനിടെ അതിനേക്കാള്‍ വലിയൊരു പാമ്പിന്‍റെ വാല് പുറത്ത് കാണുന്നു. ആദ്യം പുറത്തുവന്ന പാമ്പിനെ വലം കൈയില്‍ പിടിച്ച് ഇടംകൈകൊണ്ട് രണ്ടാമത്തെ പാമ്പിനെയും പിടികൂടുന്നു.
കൂറ്റന്‍ പാമ്പുകളെ വെറും കൈയുപയോഗിച്ച് യുവതി പിടിക്കുന്ന വീഡിയോ വളരെ പെട്ടെന്നാണു വൈറലായത്. എട്ട് ലക്ഷത്തിന് മുകളില്‍ ആളുകള്‍ ഇതിനകം ഇതു കണ്ടുകഴിഞ്ഞു. “വീടിനുള്ളിൽ പാമ്പുകളെ കണ്ടാൽ ഞാന്‍ വീട് വിട്ടിരിക്കും’ എന്നായിരുന്നു ഒരാളുടെ കമന്‍റ്.
Just another normal day in Australiao90 pic.twitter.com/SUCNeltwdW
— Insane Reality Leaks (@InsaneRealitys) August 17, 2023
