ലോകത്തിലെ ഏറ്റവും അപകടകരമായ മൃഗങ്ങളിൽ ഒന്നായി കണക്കാക്കുന്ന മൃഗമാണ് കടുവ. മിക്ക ആളുകളും കടുവയുടെ അടുത്തേക്ക് പോകാൻ പോലും ഭയപ്പെടുന്നു. ദുബായ് പോലൊരു രാജ്യത്ത് ഇതല്ല സ്ഥിതി. സിംഹങ്ങൾ, ജിറാഫുകൾ, കുരങ്ങുകൾ, കരടികൾ തുടങ്ങിയ മൃഗങ്ങളെ വളർത്തിക്കൊണ്ട് രാജ്യത്തെ നിരവധി ആളുകൾ അവരുടെ വീടുകൾ സ്വകാര്യ മൃഗശാലകളാക്കി മാറ്റുന്നു.
വന്യമൃഗങ്ങൾ നിറഞ്ഞ സ്വകാര്യ മൃഗശാലയുടെ ഉടമയായ ഹുമൈദ് അബ്ദുള്ള അത്തരത്തിലൊരാളാണ്. സെലിബ്രിറ്റികൾ പലപ്പോഴും അദ്ദേഹത്തിന്‍റെ വീട് സന്ദർശിക്കുകയും മൃഗങ്ങളുമായി അവരുടെ വീഡിയോകൾ പങ്കിടുകയും ചെയ്യുന്നു. അദ്ദേഹത്തിനു പുറമെ വീടുകളിൽ ചെറിയ സ്വകാര്യ മൃഗശാലകൾ ഉള്ളവരും നിരവധിയാണ്. അടുത്തിടെ സോഷ്യൽ മീഡിയ ഇൻഫ്ലുവൻസറായ നാദിയ ഖർ താൻ ഒരു കടുവയുമായി നടക്കുന്ന ഒരു വീഡിയോ പങ്കിട്ടു. പോസ്റ്റ് ചെയ്ത ഉടൻ തന്നെ വീഡിയോ വൈറലായി.
വിഡിയോയിൽ, നാദിയ ഖർ മൃഗശാലയ്ക്കുള്ളിലും ദുബായിലെ ഒരു പൊതു പാർക്കിലും കടുവയുമായി നടക്കുന്നത് കാണാം. ഇൻസ്റ്റാഗ്രാമിൽ പോസ്റ്റ് ചെയ്ത വീഡിയോയ്ക്ക് ‘എന്‍റെ വളർത്തു കടുവയെ നടക്കാൻ കൊണ്ടുപോകുന്നു, ദുബായ് വ്യത്യസ്തമാണ്’ എന്ന അടിക്കുറിപ്പും നൽകി. ഹുമൈദ് അബ്ദുള്ളയെയും മൃഗശാലയുടെ അൽബുക്കൈഷ് ജംഗിൾ (@albuqaish.jungle) എന്ന ഔദ്യോഗിക പേജിനെയും നാദിയ ടാഗ് ചെയ്തിട്ടുണ്ട്. 57 ലക്ഷത്തിലധികം കാഴ്‌ചകൾ നേടിയ വീഡിയോ അതിവേഗം ഇൻസ്റ്റഗ്രാമിൽ വൈറലായി.
ഒരു ലക്ഷത്തിലധികം ഉപയോക്താക്കൾ വീഡിയോ ലൈക്ക് ചെയ്തു. നിരവധി ഫോളോവേഴ്‌സ് തങ്ങളുടെ പ്രിയപ്പെട്ട സോഷ്യൽ മീഡിയ ഇൻഫ്ലുവൻസറോടുള്ള സ്നേഹം പ്രകടിപ്പിക്കാൻ കമന്‍റുമായെത്തി. സോഷ്യൽ മീഡിയ ലോകത്തെ ജനപ്രിയ മുഖമാണ് നാദിയ ഖർ. നിരവധി ബ്രാൻഡുകളുമായും അവർ പ്രവർത്തിച്ചിട്ടുണ്ട്. ഇൻസ്റ്റാഗ്രാമിൽ 2 ദശലക്ഷത്തിലധികം ഫോളോവേഴ്‌സ് നാദിയയ്ക്ക് ഉണ്ട്.
