ടിക് ടോക് പ്രേമികള്‍ക്ക് ആകെ വേദനയാകുകയാണ് ആരുണിയെന്ന കുഞ്ഞു കലാകാരിയുടെ വേര്‍പാട്. 14,000 ഫോളോവേഴ്‌സുള്ള ടിക് ടോക് അക്കൗണ്ടായിരുന്നു ആരുണി എസ്. കുറുപ്പെന്ന 9 വയസ്സുകാരിയുടേത്. കണ്ണനല്ലൂര്‍ ചേരിക്കോണം രമ്യയില്‍ വീട്ടില്‍ പരേതനായ സനോജിന്റെയും അശ്വതിയുടെയും ഏക മകള്‍ എഴുകോണ്‍ ശ്രീ ശ്രീ അക്കാദമിയില്‍ നാലാം ക്ലാസ് വിദ്യാര്‍ഥിനിയായിരുന്നു.
ദൈര്‍ഘ്യമേറിയ ഡയലോഗുകള്‍ പോലും ഭംഗിയായി അവതരിപ്പിച്ചിരുന്ന ആരുണിക്കു പെട്ടെന്ന് ഒട്ടേറെ ആരാധകരുണ്ടായി. എച്ച് 1 എന്‍ 1 ബാധിച്ചായിരുന്നു കഴിഞ്ഞദിവസം മരണം. പിതാവ് സനോജ് കഴിഞ്ഞ വര്‍ഷം സൗദിയിലുണ്ടായ വാഹനാപകടത്തില്‍ മരിച്ചു. സമൂഹമാധ്യമങ്ങളിലിപ്പോള്‍ അനുശോചനത്തിനൊപ്പം പഴയ ടിക് ടോക് വിഡിയോകളും വ്യാപകമായി പ്രചരിക്കുന്നു. ടിക് ടോക് ബയോയില്‍ ‘നിങ്ങളുടെ സ്‌നേഹത്തിനും പിന്തുണയ്ക്കും ഒത്തിരി നന്ദി… ഞാന്‍ ഒരു നീണ്ട ഇടവേളയെടുക്കുന്നു..’ എന്നെഴുതിയ ശേഷമാണ് ആരുണി വിട പറഞ്ഞത്.
