റിയാദ്: സൗദിയിൽ ഒരാഴ്ചത്തേക്ക് ശക്തമായ ശീതക്കാറ്റ് വീശുമെന്ന് കാലാവസ്ഥാ വിദഗ്ധരുടെ മുന്നറിയിപ്പ്. രാജ്യത്തിന്‍റെ വടക്ക് പടിഞ്ഞാറൻ ഭാഗത്തുനിന്നാണ് കാറ്റ് തുടങ്ങുക. പിന്നീട് മധ്യ ഭാഗത്തേക്കും തെക്കു-കിഴക്കു പ്രവിശ്യകളിലേക്കും എത്തും. വ്യാഴാഴ്ച വരെ കാറ്റ് തുടരും.
കാലാവസ്ഥാ മാറ്റത്തെതുടര്‍ന്നാണ് ശീതക്കാറ്റ് വീശുന്നത്. ഈ വർഷത്തെ ഏറ്റവും ശക്തമായ ശീതക്കാറ്റാണ് അടിക്കുകയെന്ന് അൽ ഖസീം സർവകലാശാല പ്രഫ. സാലിഹ് അൽ റബീയാൻ അറിയിച്ചു. കൃഷിയെയും കന്നുകാലികളെയും കാറ്റ് പ്രതികൂലമായി ബാധിക്കുമെന്നാണ്‌ റിപ്പോർട്ട്.
അതേസമയം, അതിശൈത്യം കണക്കിലെടുത്ത് സൗദിയിലെ ഉത്തര അതിർത്തി പ്രവിശ്യകളിൽ സ്കൂൾ സമയത്തിൽ മാറ്റം വരുത്തിയിട്ടുണ്ട്. മൂന്നു ദിവസത്തേക്കാണ് സമയമാറ്റമെന്ന് പ്രവിശ്യ വിദ്യാഭ്യാസ വകുപ്പ് മേധാവി അറിയിച്ചു.
