ലഖ്‌നൗ: ഏകദിന ലോകകപ്പില്‍ ഇംഗ്ലണ്ടിനെതിരേ പൊരുതി ജയിച്ച ഇന്ത്യ സെമി ബർത്ത് ഏറെക്കുറെ ഉറപ്പിച്ചു. നിലവിലെ ചാമ്പ്യന്മാരായ ഇംഗ്ലണ്ടാകട്ടെ പുറത്തുമായി.
ഇന്നലത്തെ മത്സരത്തിൽ ഇന്ത്യയെ 229ല്‍ പിടിച്ചുനിര്‍ത്തിയ ഇംഗ്ലണ്ട് തിരിച്ചുവരവിന്‍റെ സൂചന നൽകിയെങ്കിലും ഇന്ത്യൻ ബൗളർമാർ ഒരു ദയയും കാട്ടാതെ എറിഞ്ഞൊതുക്കി. സ്കോര്‍ ഇന്ത്യ 229/9 (50). ഇംഗ്ലണ്ട് 129 (34.5). ഇന്ത്യൻ വിജയം 100 റൺസിന്.
ഇത് വരെ കളിച്ച ആറിൽ ആറിലും ജയിച്ചാണ് ടീം ഇന്ത്യയുടെ കുതിപ്പ്. സൗത്ത് ആഫ്രിക്കയെ പിന്തള്ളി ടീം ഇന്ത്യ ലോകകപ്പിന്‍റെ പോയിന്‍റ് പട്ടികയിൽ വീണ്ടും ഒന്നാമതെത്തി. മുഹമ്മദ് ഷമി 22 റൺസിന് നാലും, ബുംമ്ര 32 റൺസിന് മൂന്നും, കുൽദീപ് യാദവ് 24 റൺസിന് രണ്ടും വിക്കറ്റ് വീഴ്ത്തി.
തുടര്‍ച്ചയായ രണ്ടു ജയവുമായി നില്‍ക്കുന്ന ശ്രീലങ്കയും വമ്പന്മാരെ അട്ടിമറിച്ചതിന്‍റെ ആവേശത്തില്‍ അഫ്ഗാനിസ്ഥാനും ഇന്ന് ഏറ്റുമുട്ടും.
പൂനയിൽ ഉച്ചകഴിഞ്ഞ് രണ്ടു മുതലാണ് മത്സരം. ഇരുടീമുകള്‍ക്കും മുന്നോട്ടുള്ള യാത്രയ്ക്ക് ഇന്നു ജയം കൂടിയേ തീരൂ. നാലു പോയിന്‍റുമായി ശ്രീലങ്ക അഞ്ചാമതും ഇത്രതന്നെ പോയിന്‍റുള്ള അഫ്ഗാനിസ്ഥാന്‍ ഏഴാം സ്ഥാനത്തുമാണ്.
