തലശേരി: സിപിഎം പ്രവർത്തകനായ ഓട്ടോറിക്ഷാ ഡ്രൈവറെ വെട്ടിക്കൊലപ്പെടുത്താൻ ശ്രമിച്ച കേസിൽ രണ്ട് ആർഎസ്എസ് പ്രവർത്തകർ അറസ്റ്റിൽ. പൊന്ന്യം കൊടക്കളത്തെ സ്വരാജ് (29), കതിരൂർ നാമത്ത് മുക്കിലെ വിജേഷ് (30) എന്നിവരെയാണ് കൂത്തുപറന്പ് സിഐ യു.പ്രേമൻ അറസ്റ്റ് ചെയ്തത്. പ്രതികളെ ചോദ്യംചെയ്തു വരികയാണ്.
എരഞ്ഞോളിയിലെ സിപിഎം കുടക്കളം കുന്നുമ്മൽ ബ്രാഞ്ച് അംഗവും ഓട്ടോറിക്ഷാ ഡ്രൈവറുമായ കുണ്ടാഞ്ചേരി ഹൗസിൽ ശ്രീജൻ ബാബുവിനെ (43) വെട്ടിക്കൊലപ്പെടുത്താൻ ശ്രമിച്ച സംഭവത്തിലാണ് അറസ്റ്റ്.
കഴിഞ്ഞ തിങ്കളാഴ്ച ഉച്ചകഴിഞ്ഞ് 2.30 ഓടെ തലശേരി പൊന്ന്യം നായനാർ റോഡിലെ ഓട്ടോ സ്റ്റാൻഡിൽ വച്ചായിരുന്നു ശ്രീജൻ ബാബുവിനെ പത്തംഗസംഘം വെട്ടിക്കൊലപ്പെടുത്താൻ ശ്രമിച്ചത്. കൈകാലുകൾക്കും തലയ്ക്കും ഗുരുതരമായി വെട്ടേറ്റ ശ്രീജൻ ബാബു കോഴിക്കോട്ടെ സ്വകാര്യ ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിലാണ്. എരഞ്ഞോളി ഗ്രാമപഞ്ചായത്ത് പ്രസിഡന്‍റ് എ.കെ. രമ്യയുടെ ഭർത്താവാണ് ശ്രീജൻ.
