അഞ്ചാം ദേശീയ പുരസ്‌കാര നിറവിൽ ശ്രേയാ ഘോഷാൽ. ചൊവ്വാഴ്ച ഡൽഹി വിജ്ഞാൻ ഭവനിൽ നടന്ന ചടങ്ങിലാണ് ഗായിക തന്‍റെ അഞ്ചാമത്തെ പുരസ്കാരം ഏറ്റുവാങ്ങിയത്.
‘ഇരവിൻ നിഴൽ’ എന്ന തമിഴ് ചിത്രത്തിലെ ‘മായാവ ചായവ’ എന്ന ഗാനത്തിനാണ് ശ്രേയ ഘോഷാലിന് പുരസ്കാരം. രാഷ്ട്രപതി ദ്രൗപതി മുർമുവിൽ നിന്ന് അവാർഡ് സ്വീകരിക്കുന്ന ഒരു വീഡിയോ ഗായിക തന്‍റെ ഇൻസ്റ്റഗ്രാം അക്കൗണ്ടിലൂടെ പങ്കിട്ടു.
“ദൈവം എന്നോട് വളരെ ദയ കാണിച്ചിരിക്കുന്നു. ഇന്ന് ബഹുമാനപ്പെട്ട രാഷ്ട്രപതി ശ്രീമതി ദ്രൗപതി മുർമു ജിയിൽ നിന്ന് ദേശീയ അവാർഡ് വാങ്ങി, ഈ ബഹുമദിയ്ക്ക് നന്ദി.
അതോടൊപ്പം ഇരവിൻ നിഴലിലെ മായാവ ചായവ എന്ന മനോഹരമായ ഗാനത്തിന് എ ആർ റഹ്മാൻ, രാധാകൃഷ്ണൻ പാർത്ഥിബൻ, രാകേന്ദു മൗലി വെണ്ണേലകണ്ടി എന്നിവർക്ക് പ്രത്യേക നന്ദി അറിയിക്കുകയും ചെയ്തു.
സോഷ്യൽ മീഡിയയിൽ ആരാധകരും സെലിബ്രിറ്റികളും ശ്രേയയെ പ്രശംസിച്ച് എത്തിയിരുന്നു. സോനു നിഗം, സുനിധി ചൗഹാൻ നകുൽ മേത്ത എന്നിവർ അഭിനന്ദിച്ചുള്ള കമന്‍റുകളുമായെത്തി.
2003 ൽ ‘ദേവ്ദാസ്’ എന്ന ചിത്രത്തിലെ ബൈരി പിയ എന്ന ഗാനത്തിനാണ് ശ്രേയാ ഘോഷാൽ ആദ്യമായി ദേശീയ അവാർഡ് നേടിയത്. പിന്നീട് ‘ധീരെ ജൽന’ ( പഹേലി ), ‘യേ ഇഷ്ക് ഹായേ’ ( ജബ് വി മെറ്റ് ) എന്നിവയ്ക്കും ദേശീയ അവാർഡുകൾ ലഭിച്ചിരുന്നു. 2010 ൽ രണ്ട് ഗാനങ്ങൾക്കാണ് ദേശീയ അവാർഡ് നേടിയത്. മറാത്തി ചിത്രമായ ജോഗ്വായിലെ ജിവ് ദംഗ്ലയും ബംഗ്ലാ സിനിമയായ അന്തഹീനിലെ ഫെരാരി മോനും.
