കുളത്തുപ്പുഴ കുളത്തുപ്പുഴയില്‍ വീണ്ടും തെരുവ് നായയുടെ ആക്രമണം. ബസിറങ്ങി നടന്നു പോയ കുളത്തുപ്പുഴ സര്‍വീസ് സഹകരണബാങ്ക് മുന്‍ സെക്രട്ടറിയും പൊതുപ്രവര്‍ത്തകനുമായ ആര്‍ കുട്ടന്‍പിള്ളയടക്കം നിരവധിപേരെ നായ ആക്രമിച്ചു. നായയുടെ ആക്രമണത്തില്‍ കുട്ടന്‍പിള്ളയുടെ കാലിന് സാരമായി പരിക്കേറ്റു. കൈക്കും പരിക്കേറ്റിട്ടുണ്ട്. അദ്ദേഹത്തെ പുനലൂര്‍ താലൂക്ക് ആശുപത്രിയിലേക്ക് മാറ്റിയിട്ടുണ്ട്.
അതേസമയം നായ്ക്ക് പേ ഉണ്ടെന്ന സംശയത്തെ തുടര്‍ന്ന് ഏറെ നേരത്തെ പരിശ്രമത്തിനൊടുവില്‍ നായയെ നാട്ടുകാര്‍ തല്ലികൊന്നു. എന്നാല്‍ നായ നിരവധി മറ്റുനായ്ക്കളെ കടിച്ചത് നാട്ടുകാരില്‍ ആശങ്ക ഉയര്‍ത്തിയിട്ടുണ്ട്. രാവിലെ സാംനഗര്‍സ്വദേശി രാജന്‍ എന്നയാളെ നായ ആക്രമിച്ചു ഗുരുതരമായി പരിക്കേല്‍പ്പിച്ചിരുന്നു.
ഇയാളെ തിരുവനന്തപുരം മെഡിക്കല്‍കോളേജ് ആശുപത്രിയിലേക്ക് മാറ്റിയിട്ടുണ്ട്. സ്കൂൾ കുട്ടികളും നിരവധി ആൾക്കാർ പോകുന്ന സമയത്തും നായ ശല്യം രൂക്ഷമായിരിക്കുകയാണ് .കുളത്തുപ്പുഴ പഞ്ചായത്ത് ഇതിനെതിരെ ഇതുവരെ ഒരു നടപടിയും സ്വീകരിക്കാതത്തതിനാൽ ജനകീയ സമരത്തിന് ഒരുങ്ങുകയാണ് നാട്ടുകാർ .
