മണ്ണാർക്കാട്: സ്കൂൾ വിദ്യാർത്ഥിനികളുമായി കറങ്ങാനിറങ്ങിയ യുവാക്കളെ മണ്ണാർക്കാട് പോലീസ് അറസ്റ്റുചെയ്തു. നെല്ലിപ്പുഴ ദാറുന്നജാത്ത് സ്കൂളിലെ വിദ്യാർത്ഥിനികളായ പെണ്‍കുട്ടികൾ രാവിലെ ഏഴിന് സ്പെഷൽ ക്ലാസ് എന്നുപറഞ്ഞാണ് വീട്ടിൽനിന്നും ഇറങ്ങിയത്.
വിദ്യാർഥിനികളെ കാണാതായതോടെ വീട്ടുകാർ മണ്ണാർക്കാട് വിവിധ പ്രദേശങ്ങളിൽ തെരച്ചിൽ നടത്തിയെങ്കിലും കണ്ടെത്താനായില്ല. വൈകുന്നേരം യുവാക്കളോടൊപ്പം കാറിൽ തെങ്കര പുഞ്ചക്കോട് വന്നിറങ്ങിയ വിദ്യാർത്ഥികളെ നാട്ടുകാർ പിടികൂടി പോലീസിൽ ഏല്പിക്കുകയായിരുന്നു.
പ്രായപൂർത്തിയാകാത്ത പെണ്‍കുട്ടികളുമായി കറങ്ങിയ ചെർപ്പുളശേരി വീരമംഗലം സ്വദേശികളായ പുളിക്കപറന്പിൽ മുഹമ്മദ് മുസ്തഫ (20), തൃക്കടീരി കരിന്പംചോല അലി അഹമ്മദ് (20) എന്നിവർക്കെതിരെ പോലീസ് പോക്സോ, കടത്തികൊണ്ടുപോകൽ, വിവാഹവാഗ്ദാനം നല്കി വഞ്ചിക്കൽ എന്നീ കുറ്റങ്ങൾ ചുമത്തി കേസെടുത്തു.
ഇവർ സഞ്ചരിച്ച വാഹനം ബന്ധുക്കളും നാട്ടുകാരും അടിച്ചുതകർത്തു. കാർ പോലീസ് കസ്റ്റഡിയിലെടുത്തു. വാടക കാറെടുത്ത് വിദ്യാർത്ഥികളെ കയറ്റി പെരിന്തൽമണ്ണ ഭാഗത്തെ കൊടികുത്തി മലയിലാണ് ഇവർ കറങ്ങാനിറങ്ങിയത്. ഒരു വിദ്യാർത്ഥിനിയുമായി പ്രതികളിലൊരാളായ മുസ്തഫ ജൂണ്‍ 19 ന് മലന്പുഴയിലും പോയതായി പോലീസ് പറഞ്ഞു.
ഈ വിദ്യാർത്ഥിനിയാണ് കൂട്ടുകാരിയെ പ്രലോഭിപ്പിച്ച് കൂടെ കൂട്ടിയത്. യുവാക്കൾ വിവിധ സ്കൂളുകളിൽനിന്ന് ഇത്തരത്തിൽ പെണ്‍കുട്ടികളെ വശീകരിച്ച് പീഡിപ്പിച്ചിട്ടുള്ളതായി വിവരം ലഭിച്ചു.
