ദൃശ്യമാധ്യമങ്ങളില്‍ പുരുഷഹാസ്യ താരങ്ങളെ തോല്‍പ്പിക്കുന്ന പ്രകടനം കാഴ്ചവയ്ക്കുന്ന ഹാസ്യതാരമാണ് നടി സുബി സുരേഷ്. ഉരുളയ്ക്കുപ്പേരി എന്ന രീതിയിലാണ് സുബിയുടെ ഓരോ സംസാരവും പ്രകടനങ്ങളും. ഇക്കാരണങ്ങള്‍ക്കൊണ്ടൊക്കെയാവണം, പലര്‍ക്കും താന്‍ ആണാണോ അതോ പെണ്ണാണോ എന്ന സംശയമുണ്ടെന്നാണ് നടി സുബി സുരേഷ് പറയുന്നത്. ഒരു ചാനല്‍ പരിപാടിക്കിടെയാണ് സുബി ഇക്കാര്യം വ്യക്തമാക്കിയത്. “മമ്മൂക്കയും ആ ചോദ്യം ഉന്നയിച്ചിട്ടുണ്ടെന്നാണ് എന്റെ ഒരു അറിവ്. എനിക്ക് ഇക്കാര്യം ആരെയും ബോധിപ്പിക്കേണ്ടതില്ല. ചിലപ്പോള്‍ ആ സംശയം ഉള്ളതുകൊണ്ടായിരിക്കും എന്നെ അദ്ദേഹത്തിന്റെ സിനിമകളില്‍ അഭിനയിക്കാന്‍ വിളിക്കാത്തത്”.സുബി പറയുന്നു. അത് ആരെങ്കിലും ഒന്ന് പറഞ്ഞ് ശരിയാക്കണമെന്നും സുബി തമാശരൂപത്തില്‍ പറയുന്നു.
അമേരിക്കയില്‍ നടന്ന ദിലീപ് ഷോയില്‍ ഞാനും പങ്കെടുത്തിരുന്നു. ആ ട്രിപ്പിനിടയ്ക്ക് നാദിര്‍ഷ പറഞ്ഞു “ഈ ട്രിപ്പിനിടയ്ക്ക് കുറേ കാര്യങ്ങള്‍ തെളിയാനുണ്ടായിരുന്നു. അതൊക്കെ തെളിയിച്ചു. ഇനിയാകെ തെളിയിക്കാനുള്ളത് നീ ആണാണോ പെണ്ണാണോ എന്നുള്ളതാണ്.’ സുബി പറയുന്നു. പരിപാടിക്ക് പോകുമ്പോള്‍ മിമിക്രി ടീമിനൊപ്പമാണ് കൂടുതല്‍ കൂട്ടുകൂടുന്നത്. പിഷാരടി, ധര്‍മജന്‍, യൂസഫ് തുടങ്ങിയവരുടെ ഗ്രൂപ്പുണ്ട്. ഷോപ്പിംഗ് ഒന്നും വലുതായി ചെയ്യാത്തതുകൊണ്ട് ഇവരോടൊപ്പം കറങ്ങാന്‍ പോകും. അതൊക്കെ കൊണ്ടായിരിക്കും ഇവര്‍ക്കെല്ലാം ഇങ്ങനൊരു സംശയം വരാന്‍ കാരണം. സുബി പറയുന്നു.
