ഇരവിപേരൂർ: പ്രകൃതിയോടിണങ്ങിയാകണം വികസനമുണ്ടാകേണ്ടതെന്ന് മന്ത്രി ജി. സുധാകരന്‍. കല്ലിശേരി-ഇരവിപേരൂര്‍ റോഡിന്‍റെ നിർമാണോദ്ഘാടനം നെല്ലാട് ജംഗ്ഷനില്‍ നിര്‍വഹിച്ച് പ്രസംഗിക്കുകയായിരുന്നു മന്ത്രി.പ്രകൃതി വിയോജിച്ചാല്‍ നമുക്ക് ഒന്നും ചെയ്യുവാന്‍ കഴിയുകയില്ല. പ്രളയങ്ങള്‍ അതാണ് സാക്ഷ്യപ്പെടുത്തുന്നത്. അതു കൊണ്ട് പ്രകൃതിയോട് യോജിക്കുന്ന കാഴ്ചപ്പാടിലാവണം വികസനം സൃഷ്ടിക്കേണ്ടത്.പിന്നോക്ക ജില്ല എന്നറിയപ്പെട്ടിരുന്ന പത്തനംതിട്ട വികസനത്തിന്‍റെ പാതയില്‍ കുതിക്കുകയാണ്. കൃഷി, കെട്ടിടം, വിദ്യാഭ്യാസം എന്നിവയിലെല്ലാം വികസനം കൈവരിക്കുകയാണെന്നും മന്ത്രി പറഞ്ഞു.
വീണാ ജോര്‍ജ് എംഎല്‍എ അധ്യക്ഷത വഹിച്ച ചടങ്ങില്‍ ജില്ലാ പഞ്ചായത്ത് പ്രസിഡന്‍റ് അന്നപൂര്‍ണാദേവി, കേരള ഷോപ്സ് ആന്‍ഡ് എസ്റ്റാബ്ലിഷ്മെന്റ് വര്‍ക്കേഴ്സ് വെല്‍ഫെയര്‍ ബോര്‍ഡ് ചെയര്‍മാന്‍ കെ. അനന്തഗോപന്‍, ജില്ലാ പഞ്ചായത്ത് വൈസ് പ്രസിഡന്‍റ് ജോര്‍ജ് മാമന്‍ കൊണ്ടൂര്‍, കോയിപ്രം ബ്ലോക്ക് പഞ്ചായത്ത് പ്രസിഡന്‍റ് ആര്‍. കൃഷ്ണകുമാര്‍, ഇരവിപേരൂര്‍ ഗ്രാമപഞ്ചായത്ത് പ്രസിഡന്‍റ് എം.ടി. അനസൂയദേവി, വൈസ് പ്രസിഡന്‍റ് എന്‍. രാജീവ്, കോയിപ്രം ബ്ലോക്ക് പഞ്ചായത്ത് മെംബര്‍ കെ. സി. സജികുമാര്‍, ജനപ്രതിനിധികള്‍, സാമൂഹിക, രാഷ്ട്രീയ പ്രവര്‍ത്തകര്‍, പൊതുമരാമത്ത് നിരത്തു വിഭാഗം എക്സിക്യുട്ടീവ് എന്‍ജിനിയര്‍ ആര്‍.അനില്‍കുമാര്‍ തുടങ്ങിയവര്‍ പങ്കെടുത്തു.
തിരുവല്ല – കുമ്പഴ സംസ്ഥാനപാതയേയും എംസി റോഡിനേയും ബന്ധിപ്പിക്കുന്നതാണ് കല്ലിശേരി-ഇരവിപേരൂര്‍ റോഡ്. തിരുവല്ല-കുമ്പഴ സംസ്ഥാനപാതയിലെ നെല്ലാട് ജംഗ്ഷനെയും എംസി റോഡിലെ ചെങ്ങന്നൂരിനടുത്തുളള കല്ലിശേരിയേയും തമ്മില്‍ ബന്ധിപ്പിക്കുന്ന പ്രധാന റോഡാണിത്.
റോഡിന് 7.510 കിലോമീറ്റര്‍ ദൂരമാണുളളത്. ബഗോറ ഇന്‍ഫ്രാസ്ട്രക്ചര്‍ ആന്‍ഡ് ഡവലപ്പേഴ്സ് പ്രൈവറ്റ് ലിമിറ്റഡാണ്റോഡ് നിര്‍മാണം നടത്തുക. 12 മാസമാണ് നിര്‍മാണ കാലാവധി. 6.60 ലക്ഷം രൂപയാണ് നിര്‍മാണതുക. ആധുനിക രീതിയില്‍ റോഡ് ബിഎം ആന്‍ഡ് ബിസി ചെയ്ത് സുരക്ഷാസംവിധാനങ്ങളും ഒരുക്കും.
