ചെറായി: രാഷ്ട്രീയം ജനങ്ങളിൽനിന്ന് അകന്നുകൊണ്ടിരിക്കുന്ന നിലവിലെ കാലഘട്ടത്തിൽ രാഷ്ട്രീയ പാർട്ടികൾ ശൈലി മാറ്റണമെന്നും അല്ലാത്തപക്ഷം ജനം രാഷ്ട്രീയത്തിൽനിന്ന് ഇനിയും അകന്ന് കൊണ്ടിരിക്കുമെന്നും മുതിർന്ന കോണ്ഗ്രസ് നേതാവും മുൻ കെപിസിസി പ്രസിഡന്‍റുമായിരുന്ന വി.എം. സുധീരൻ അഭിപ്രായപ്പെട്ടു.
കോണ്ഗ്രസ് നേതാവായിരുന്നു കെ.എസ്. ഷാജിയുടെ അനുസ്മരണ സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. രാഷ്ട്രീയം ജനത്തിന് വേണ്ടി ആയിരിക്കണമെന്നും അധികാരത്തിനു മാത്രമായിരിക്കരുതെന്നും അദേഹം പറഞ്ഞു.
കെ.എസ്. ഷാജി സ്മാരക ട്രസ്റ്റാണ് പരിപാടി സംഘടിപ്പിച്ചത്. പള്ളത്താം കുളങ്ങരയിൽ നടന്ന സമ്മേളനത്തിൽ ട്രസ്റ്റ് ചെയർമാൻ എം.ബി. ചന്ദ്രഹാസൻ അധ്യക്ഷനായി. മഹിളാ കോണ്ഗ്രസ് സംസ്ഥാന അധ്യക്ഷ ലതിക സുഭാഷ് , കെപിസിസി സെക്രട്ടറി എം.വി. പോൾ, ഡോ. അജിതൻ മേനോത്ത്, എം.ജെ. ടോമി, കെ.ആർ. സുഭാഷ്, കെ.വി. അഗസ്റ്റിൻ, എം.എം. പ്രമുഖൻ, ടി.ജെ. അനിരുദ്ധൻ, നസീബ ശുക്കൂർ എന്നിവർ പ്രസംഗിച്ചു.
