ചാലക്കുടി: മോഡലിംഗ് രംഗത്ത് അവസരങ്ങൾ വാഗ്ദാനം ചെയ്ത് മോഹിപ്പിച്ച് പത്തൊമ്പതുകാരിയെ പീഡനത്തിന് ഇരയാക്കിയ കേസിൽ ഒരു ഇടനിലക്കാരി കൂടി പിടിയിൽ.
തിരുവനന്തപുരം പെരുമാതുറ സ്വദേശിനി കമ്പലായിക്കയം വീട്ടിൽ സീന എന്നറിയപ്പെടുന്ന സുഹറ നസീറി(42)നെയാണ് തൃശൂർ റൂറൽ ഡിസിആർബി ഡിവൈഎസ്പി പ്രദീപ് കുമാർ, ചാലക്കുടി ഡിവൈഎസ്പി സി.ആർ.സന്തോഷ് എന്നിവരുടെ നേതൃത്വത്തിലുള്ള പ്രത്യേക അന്വേഷണസംഘം അറസ്റ്റുചെയ്തത്.
കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. മറ്റുള്ളവർ പിടിയിലായതറിഞ്ഞു സീന ഫോണ് സ്വിച്ച് ഓഫ് ചെയ്തു തിരുവനന്തപുരത്തേക്കു മുങ്ങിയിരിക്കുകയായിരുന്നു. അവിടത്തെ വിലാസത്തിൽ അന്വേഷിച്ചെങ്കിലും കണ്ടെത്താനായില്ല. പിടിയിലായവരിൽനിന്നു പുരുഷപേരിലുള്ള സീനയുടെ ഫേസ്ബുക്ക് അക്കൗണ്ട് കണ്ടെത്തി.
അതിലൂടെ ഇടപാടുകാരെന്ന വ്യാജേന ബന്ധപ്പെട്ട് തന്ത്രപരമായി വിളിച്ചുവരുത്തി പിടികൂടുകയായിരുന്നു. പിടിയിലാകുമ്പോൾ കോട്ടയം സ്വദേശിയായ ഒരു യുവാവും ഒപ്പമുണ്ടായിരുന്നു. ചാലക്കുടിയിൽ ഡോക്ടർമാരും മറ്റും താമസിക്കുന്ന മേഖലയിൽ വാടകയ്ക്കു താമസിച്ച് ഹോം നഴ്സിംഗ് ഏജന്‍റ് എന്ന വ്യാജേനയായിരുന്നു ഇടപാടുകൾ.
