ആലുവ: നടിയെ ആക്രമിച്ച സംഭവത്തിൽ നുണപരിശോധനയ് ക്കു തയാറല്ലെന്നു മുഖ്യപ്രതി പൾസർ സുനി കോടതിയിൽ അറിയിച്ചു. ആലുവ ഒന്നാം ക്ലാസ് ജുഡീഷ്യൽ മജിസ്ട്രേറ്റ് കോടതിയിൽ ഇന്നലെ ഹാജരാക്കിയപ്പോഴാണു സുനി ഇക്കാര്യം അറിയിച്ചത്. നുണപരിശോധനയ് ക്കു മാനസികമായും ശാരീരികമായും തയാറല്ലെന്നും അതിനാൽ ഒഴിവാക്കണമെന്നുമാണു സുനി കോടതിയിൽ പറഞ്ഞത്.അതേസമയം, പോലീസിന്‍റെ ആവശ്യപ്രകാരം പൾസർ സുനി, വിജീഷ് എന്നിവരുടെ കസ്റ്റഡി കാലാവധി ഈ മാസം പത്തുവരെ കോടതി നീട്ടി.
താൻ ഒറ്റയ്ക്കാണു നടിയെ ആക്രമിക്കാൻ തീരുമാനമെടുത്തതെന്നാണു ചോദ്യംചെയ്യലിൽ പൾസർ സുനിയുടെ മൊഴി. എന്നാൽ, ഇയാളുടെ കൂട്ടുപ്രതികളെ ചോദ്യം ചെയ്തപ്പോൾ വൻ ഗൂഢാലോചനയുണ്ടെന്ന സൂചനയാണു പോലീസിനു ലഭിച്ചതെന്നറിയുന്നു. നടിയുടെ ദൃശ്യങ്ങൾ പകർത്തിയ മൊബൈൽ ഫോണിനെക്കുറിച്ചുള്ള വിവരങ്ങൾ സുനി പലപ്പോഴായി മാറ്റിപ്പറഞ്ഞിരുന്നു. ഈ സാഹചര്യത്തിലാണ് നുണപരിശോധന നടത്താനുള്ള സാധ്യത പോലീസ് ആരാഞ്ഞത്. സുനി വിസമ്മതിച്ചതിനെത്തുടർന്ന് അതുമങ്ങി. സുനി അന്വേഷണത്തോടു സഹകരിക്കുന്നില്ലെന്നും പരസ്പരവിരുദ്ധമായ മൊഴികളാണ് നൽകുന്നതെന്നും പോലീസ് കോടതിയെ അറിയിച്ചു.
