ലോകം മുഴുവന്‍ ഹിറ്റായ ഐസ്ബക്കറ്റ് ചലഞ്ചിനു ശേഷം രൂചിയുള്ള ദോശ ചലഞ്ചുമായി എത്തിയിരിക്കുകയാണ് സാക്ഷാല്‍ സൂര്യ. പുരുഷ കേസരികളെ ഉദ്ദേശിച്ചാണ് സൂര്യ ഈ വെറൈറ്റി ചലഞ്ച് അവതരിപ്പിച്ചിരിക്കുന്നത്. ദോശകൊണ്ടോരു തീറ്റ മത്സരമാണ് സൂര്യ ഉദ്ദേശിക്കുന്നതെന്നു കരുതി ദോശക്കൊതിയന്‍മാര്‍ സന്തോഷിക്കാന്‍ വരട്ടെ. സംഭവം അതല്ല. നിങ്ങളുടെ പ്രിയതമയ്ക്ക് അടുക്കളയില്‍ കയറി ഒരു ദോശ ഉണ്ടാക്കി കൊടുക്കണം. എന്നിട്ട് അതിന്‍റെ ചിത്രം ട്വിറ്ററില്‍ പങ്കുവെക്കുകയും വേണം.ഇതാണ് ദോശ ചലഞ്ച്.
ജ്യോതികയ്ക്കു ദോശയുണ്ടാക്കി നല്‍കിയതിന്‍റെ ചിത്രം സൂര്യ ട്വിറ്ററില്‍ ഇട്ടതോടെ മാധവന്‍, വെങ്കട്പ്രഭു, ജയ് തുടങ്ങിയ തമിഴ് ചലച്ചിത്ര താരങ്ങളും ദോശയുണ്ടാക്കാന്‍ അടുക്കളില്‍ കയറി. ഒരിടവേളയ്ക്കു ശേഷം ജ്യോതിക മുഖ്യവേഷത്തിലെത്തുന്ന ’മഗളിര്‍ മട്ടുമിന്‍’ എന്ന ചിത്രത്തിന്‍റെ ടീസറാണ് സൂര്യയ്ക്കു ദോശചലഞ്ചിനു പ്രോരണയായതെന്നാണ് റിപ്പോര്‍ട്ടുകള്‍. കഴിഞ്ഞ ദിവസം പുറത്തിറങ്ങിയ ചിത്രത്തിന്‍റെ ടീസറില്‍, വീട്ടമ്മാര്‍ ഇതുവരെയുണ്ടാക്കിയ ദോശയുടെ കണക്കു പറഞ്ഞു പരിതപിക്കുന്ന രംഗങ്ങളാണ് കാണിക്കുന്നത്.
വീട്ടിലെല്ലാവര്‍ക്കും ദോശ വിളന്പുന്ന നിങ്ങള്‍ക്ക് ഇന്നുവരെ ആരെങ്കിലും ദോശ ഉണ്ടാക്കി തന്നിട്ടുണ്ടോ എന്നു വീട്ടമ്മമാരോടു ജ്യോതിക ചോദിക്കുന്നതും ടീസറില്‍ കാണാം.സൂര്യയൂടെ ഉടമസ്ഥതയിലുള്ള 2 ഡി എന്‍റര്‍ടെയിന്‍മെന്‍റാണ് ചിത്രം നിര്‍മ്മിക്കുന്നത്.
