കോതമംഗലം: ദേശീയ പാതയില്‍ നേര്യമംഗലത്തിന് സമീപം വില്ലാംചിറയില്‍ ബസുകളും ടാങ്കറും കൂട്ടിയിടിച്ച് അപകടം. നാല് ബസ് യാത്രക്കാര്‍ക്ക് പരിക്ക്. വില്ലാംചിറ അടിവാരത്തില്‍ ഇന്നലെ വൈകിട്ട് നാലിനായിരുന്നു അപകടം.
തൊടുപുഴ-കമ്പിളികണ്ടം റൂട്ടിലോടുന്ന സെന്‍റ് മേരീസ് ബസും തൊടുപുഴ-അടിമാലി റൂട്ടിലെ പിഎന്‍എസ് ബസും തമ്മിൽ കൂട്ടിയിടിച്ചാണ് അപകടം. പിഎന്‍എസ് ബസ് ഒരു ടാങ്കര്‍ ലോറിയില്‍ ഇടിച്ചാണ് നിന്നത്.
സെന്‍റ് മേരീസ് ബസും ടാങ്കർ ലോറിയും ഹൈറേഞ്ച് ഭാഗത്തേക്കും പിഎന്‍എസ് എതിര്‍ദിശയിലുമായിരുന്നു. ലോറിയുടെ മുന്‍ഭാഗത്താണ് ബസ് ഇടിച്ചത്.
ഇടിയുടുടെ ആഘാതം ചെറുതായിരുന്നതിനാലും ടാങ്കറിന്‍റെ ടാങ്കിൽ ഇടിയേല്‍ക്കാതിരുന്നതിനാലും വലിയ ദുരന്തം ഒഴിവായി.
രണ്ട് ബസുകളിലെയും യാത്രക്കാര്‍ക്ക് ചെറിയ പരിക്കുകളാണുണ്ടായത്. സെന്‍റ് മേരീസ് ബസ് ടാങ്കര്‍ ലോറിയെ ഓവര്‍ടേക്ക് ചെയ്യുന്നതിനിടെയാണ് അപകടം.
വില്ലാംചിറയിലെ വളവിലാണ് അപകടം നടന്നത്. അപകടത്തെ തുടര്‍ന്ന് വാഹന ഗതാഗതം തടസപ്പെട്ടു. ക്രെയിന്‍ ഉപയോഗിച്ച് ബസ് റോഡില്‍നിന്നു മാറ്റിയാണ് ഗതാഗതം പുനഃസ്ഥാപിച്ചത്.
