പയ്യന്നൂര്‍: മദ്യലഹരിയില്‍ കാറോടിച്ച് അപകടമുണ്ടാക്കിയ അധ്യാപകനെതിരേ വകുപ്പ്തല നടപടിക്ക് ശിപാർശ. സൗത്ത് തൃക്കരിപ്പൂര്‍ ഗവ.ഹയര്‍ സെക്കൻഡറി സ്‌കൂള്‍ അധ്യാപകന് കരിവെള്ളൂരിലെ രാമനിലയത്തില്‍ കെ.ജയേഷിനെ(42)യാണ് മദ്യപിച്ച് കാറോടിച്ചതിന് ഇന്നലെ പയ്യന്നൂർ പോലീസ് അറസ്റ്റ് ചെയ്തത്. ഇന്നലെ ഉച്ചയോടെ കരിവെള്ളൂരിലാണ് സംഭവം.
സ്‌കൂളില്‍നിന്നും അവധിയെടുത്ത അധ്യാപകനാണ് മദ്യലഹരിയിലോടിച്ച കാര്‍ ചെറുതാഴം അതിയടത്തെ രാഹുലിന്‍റെ കാറിന്‍റെ പിന്നിലിടിച്ച് അപകടമുണ്ടാക്കിയത്.പട്രോളിംഗിനിടയിലെത്തിയ പോലീസ് കസ്റ്റഡിയിലെടുത്ത ഇയാളെ പയ്യന്നൂര്‍ താലൂക്ക് ആശുപത്രിയില്‍ വൈദ്യപരിശോധനക്ക് വിധേയനാക്കി.
മദ്യപിച്ചിട്ടുണ്ടെന്ന് തെളിഞ്ഞതിനെ തുടര്‍ന്നാണ് പോലീസ് ഇയാളെ മദ്യപിച്ച് വാഹനമോടിച്ച് അപകടമുണ്ടാക്കിയ കുറ്റത്തിന് അറസ്റ്റ് ചെയ്തത്. ഇയാളോടിച്ചിരുന്ന കാറും പോലീസ് കസ്റ്റഡിയിലെടുത്തു.
