സിനിമാ ലോകത്തെ എന്നും വിസ്മയിപ്പിച്ചിട്ടുള്ള താരമാണ് തബു. ചെയ്യുന്ന വേഷം ചെറുതോ വലുതോ എന്നതല്ല. ആരാധകരുടെ മനസു കീഴടക്കുകയാണ് തബുവിന്‍റെ ലക്ഷ്യം. ഒപ്പം അഭിനയിക്കുന്നത് ആരായാലും തന്നിലേക്ക് ആസ്വാദകരുടെ ശ്രദ്ധ കൊണ്ടുവരാനും തബുവിനു കഴിയുമെന്നത് മറ്റു താരങ്ങൾ സമ്മതിച്ചതാണ്.
എല്ലാത്തരം കഥാപാത്രങ്ങളെയും കൈകാര്യം ചെയ്യാനാകുന്ന തബുവിന്‍റെ ഏറ്റവും വലിയ ആഗ്രഹം ഹാസ്യകഥാപാത്രങ്ങൾ ചെയ്യണമെന്നതാണ്. ഇക്കാര്യം പല അഭിമുഖങ്ങളിലും താരം തന്നെ നേരിട്ടു പറഞ്ഞിട്ടുള്ളതുമാണ്. ഇപ്പോഴിതാ ഹാസ്യചിത്രമായ ഗോൽമാലിന്റെ നാലാം ഭാഗത്തിനായി അജയ് ദേവ്ഗണും തബുവും ഒന്നിക്കുകയാണ്.
ദൃശ്യം എന്ന ചിത്രത്തിനായാണ് ഇരുവരും അവസാനമായി ഒന്നിച്ചത്. പരിണീതി ചോപ്ര, തുഷാർ കപൂർ, അർഷാദ് വാർസി തുടങ്ങിയവരാണ് ചിത്രത്തിലെ മറ്റു താരങ്ങൾ.ചിത്രത്തിൽ കരീനയും ഉണ്ടാകുമെന്ന് നേരത്തെ വാർത്തകൾ വന്നിരുന്നെങ്കിലും ഒൗദ്യോഗികമായി ഇത് ഉറപ്പിച്ചിട്ടില്ല.
