ബാങ്കോക്ക്: തായ്‌ലൻഡിലെ രണ്ടു സന്യാസിമഠങ്ങളിൽ നടത്തിയ പോലീസ് റെയ്ഡിൽ 73 മൃതദേഹങ്ങൾ ഒളിപ്പിച്ചനിലയിലും നിരവധി ശവപ്പെട്ടികളും കണ്ടെത്തി. സന്യാസിമഠത്തോടു ചേർന്നുള്ള കുളത്തിൽ 600 ലധികം മുതലകളെ പാർപ്പിച്ചതായും കണ്ടെത്തിയിട്ടുണ്ട്.
തായ്‌ലൻഡിലെ ഫിചിറ്റ് പ്രവിശ്യയിൽ ഫോ താലെയിലെ പ്രശസ്തമായ തിഫക്‌സോംഗ് പാ സാംഗ്‌നായതം സന്യാസിമഠമാണു റെയ്ഡ് ചെയ്തതിൽ ഒരെണ്ണം. അവിടെനിന്നു മാത്രം 41 മൃതദേഹങ്ങൾ ലഭിച്ചു.ഫിചിറ്റ് പ്രവിശ്യയുടെ തെക്ക് ഭാഗത്തുള്ള ബാംഗ് മുൻ നാക് ജില്ലയിലെ മറ്റൊരു സന്യാസിമഠത്തിൽ നടത്തിയ പരിശോധനയിൽ 32 മൃതദേഹങ്ങളും കണ്ടെത്തി.
മൃതദേഹങ്ങൾ കണ്ടെത്തിയ രണ്ടു മഠങ്ങളും മഠാധിപതിയായ ഫ്രാ അജാൻ സായ് ഫോൺ പണ്ഡിറ്റോയുമായി ബന്ധപ്പെട്ടു പ്രവർത്തിക്കുന്നതാണ്.സൗത്ത് ചൈന മോണിംഗ് പോസ്റ്റിലെ റിപ്പോർട്ട് പ്രകാരം ആദ്യത്തെ സന്യാസിമഠം 16,000 ചതുരശ്ര മീറ്റർ വിസ്തൃതിയിൽ വനത്തിൽ സ്ഥിതി ചെയ്യുന്നതാണ്. ഇവിടെ 600 ലധികം മുതലകളെ പാർപ്പിച്ചിരിക്കുന്ന കുളം ഉയർന്ന വേലികളാൽ മറയ്ക്കപ്പെട്ടനിലയിലായിരുന്നു.
മൃതദേഹങ്ങൾ മരണത്തിന് മുമ്പ് സ്വമേധയാ വ്യക്തികൾ സംഭാവന ചെയ്തതാണെന്നും ശിഷ്യന്മാരും അവരുടെ കുടുംബാംഗങ്ങളും മരണശേഷം സ്വന്തം ശരീരം സംഭാവന ചെയ്യുന്നത് പതിവാണെന്നുമാണു മഠാധികൃതരുടെ വിശദീകരണം.ഇത് തെളിയിക്കുന്നതിനായി മരണ സർട്ടിഫിക്കറ്റുകളും സമ്മതപത്രങ്ങളും അധികൃതർ പോലീസിന് സമർപ്പിച്ചു.
സന്യാസിമാരുടെ മരണഭയം മറ്റാനുള്ള ധ്യാന പരിശീലനങ്ങൾക്കാണ് മൃതദേഹങ്ങൾ ഉപയോഗിച്ചിരുന്നതെന്നു മഠാധികൃതർ അറിയിച്ചു. എന്തായാലും മൃതദേഹങ്ങൾ പോലീസ് പിടിച്ചെടുത്തു.
സന്യാസിമഠവുമായി ബന്ധപ്പെട്ട എല്ലാ പ്രവർത്തനങ്ങളും താൽകാലികമായി നിർത്തിവയ്പ്പിക്കുകയും ചെയ്തു. കണ്ടെത്തിയ മൃതശരീരങ്ങൾ ആരുടേതൊക്കെയാണെന്നും അവർ എങ്ങനെയാണ് മരിച്ചതെന്നുമുള്ള അന്വേഷണം ആരംഭിച്ചതായി തായ് പോലീസ് പറഞ്ഞു.
