എടത്വ: പുതുവർഷത്തിൽ സഹജീവികളോടുള്ള സ്നേഹം പങ്കുവച്ച് തലവടി ഗവ. വൊക്കേഷണൽ ഹൈസ്കൂൾ വിദ്യാർഥികളും അധ്യാപകരും.സ്കൂളിലെ ജൂണിയർ റെഡ് ക്രോസ് സംഘടനയുടെ നേതൃത്വത്തിലായിരുന്നു വിദ്യാർഥികളും അധ്യാപകരും ചേർന്ന് സ്കൂളിന്‍റെ സമീപത്തുള്ള ആനപ്രന്പാൽ സ്നേഹഭവൻ സന്ദർശിച്ചത്.
വിദ്യാർഥികളും അധ്യാപകരും ചേർന്ന് സമാഹരിച്ച 8000 ത്തോളം രൂപയും വസ്ത്രങ്ങളും അന്തേവാസികൾക്ക് നൽകുകയും ചെയ്തു.തുടർന്ന് വിദ്യാർഥികൾ വിവിധ കലാപരിപാടികളും അവതരിപ്പിച്ചു.
അന്തേവാസികൾകൊപ്പം ഇരുന്ന് ഉച്ചഭക്ഷണവും കഴിച്ച ശേഷമാണ് വിദ്യാർഥികളും അധ്യാപകരും മടങ്ങിയത്. കുട്ടനാട് ബ്ലോക്ക് പഞ്ചായത്ത് അംഗം സിന്ധു മഹേഷ് പരിപാടി ഉദ്ഘാടനം ചെയ്തു. അധ്യാപകരായ എ. ബി. ലിയ, ശ്രീലേഖ, കെ.എസ്. ഓമന, രതിമോൾ എന്നിവർ നേതൃത്വം നൽകി.
