തളിപ്പറമ്പ്: ആര്‍എസ്എസ് ബസ് ഷെല്‍ട്ടറിന് നേരേ വീണ്ടും കരിഓയില്‍ പ്രയോഗം. പുളിമ്പറമ്പ് സാന്‍ജോസ് റോഡിലെ വിവേകാനന്ദ വെയിറ്റിംഗ് ഷെല്‍ട്ടറിലാണ് വീണ്ടും കരിഓയില്‍ ഒഴിച്ചത്. കഴിഞ്ഞ 15 നും ഇതേ ഷെല്‍ട്ടറിന് നേര്‍ക്ക് കരി ഓയില്‍ ഒഴിച്ചിരുന്നു.
ഇത് ആര്‍എസ്എസ് പ്രവര്‍ത്തകര്‍ പോലീസ് സാന്നിധ്യത്തില്‍ കഴുകി ശുചീകരിച്ചിരുന്നു. സംഭവം സംബന്ധിച്ച് പോലീസില്‍ പരാതിയും നല്‍കിയിരുന്നു. വീണ്ടും കരി ഓയില്‍ ഒഴിച്ചതിനെതുടര്‍ന്ന് പ്രദേശത്ത് സംഘര്‍ഷം നിലനില്‍ക്കുന്നുണ്ട്. ഒരു സംഘം സിപിഎം പ്രവര്‍ത്തകര്‍ ഇന്നലെ രാത്രിയിലാണ് കരിഓയില്‍ ഒഴിച്ചതെന്ന് ആര്‍എസ്എസ് പ്രവര്‍ത്തകര്‍ പറഞ്ഞു. തളിപ്പറമ്പ് പോലീസ് സ്ഥലത്തെത്തി അന്വേഷണം നടത്തി.
