കൊച്ചി: ചികിത്സയ്‌ക്കെത്തിയ കാന്‍സര്‍ രോഗിയായ അമേരിക്കന്‍ വനിതയുടെ മൂന്നര ലക്ഷം രൂപ തട്ടിയെടുക്കുകയും ഇവരുടെ ഭിന്നശേഷിക്കാരിയായ മകളോട് അപമര്യാദയായി പെരുമാറുകയും ചെയ്ത സംഭവത്തില്‍ മധ്യവയസ്‌കന്‍ അറസ്റ്റില്‍.
പള്ളുരുത്തി കടേഭാഗം സ്വദേശി എം.ബി. റസൂല്‍(50) ആണ് ചേരാനെല്ലൂര്‍ പോലീസിന്‍റെ പിടിയിലായത്. എറണാകുളം അമൃത ആശുപത്രിയില്‍ അര്‍ബുദ രോഗത്തിന് ചികിത്സക്കെത്തിയതാണ് അമേരിക്കന്‍ വനിത.
ഇവര്‍ക്ക് വേണ്ട സഹായം ചെയ്തു നല്‍കാമെന്ന് പറഞ്ഞാണ് റസൂല്‍ യുവതിക്കൊപ്പം കൂടിയത്. തുടര്‍ന്ന് ഇവരുടെ വിശ്വാസം പിടിച്ചുപറ്റി. ശേഷം ഇവരുടെ അക്കൗണ്ടില്‍ നിന്നും മൂന്നരലക്ഷം രൂപ കൈക്കലാക്കുകയായിരുന്നു.
ഇതിനുപുറമേ ഇവരുടെ ഭിന്നശേഷിക്കാരിയായ മകളോട് ഇയാള്‍ അപമര്യാദയായി പെരുമാറുകയും ചെയ്തു. പണം തിരികെ ലഭിക്കുന്നതിന് ബന്ധപ്പെട്ടെങ്കിലും കിട്ടാതെ വന്നതോടെ പരാതിക്കാരി പോലീസിനെ സമീപിക്കുകയായിരുന്നു.
കോടതിയില്‍ ഹാജരാക്കിയ പ്രതി സമാനരീതിയില്‍ തട്ടിപ്പ് നടത്തിയിട്ടുണ്ടോയെന്ന് അന്വേഷണം ആരംഭിച്ചതായി ചേരാനെല്ലൂര്‍ പോലീസ് ഇന്‍സ്‌പെക്ടര്‍ റ്റി.എസ്. റെനീഷ് പറഞ്ഞു. പ്രതിയെ റിമാന്‍ഡ് ചെയ്തു
